قاسىم-جومارت توقايەۆ: قازىر توي تويلاپ جۇرەتىن ۋاقىت ەمەس
«الەم جۇرتشىلىعى قازاق حالقىن كوڭىلى دارقان، عالامدىق قۇبىلىستاردى ءوزىنىڭ قالىپتاسقان فيلوسوفيالىق كوزقاراسى ارقىلى قابىلداي الاتىن ۇلت رەتىندە تانىپ، بىلەدى. شىدامدىلىق پەن جاناشىرلىق - قانىمىزدا بار قاسيەت. وسىناۋ ۇلى دالاعا ەڭ العاش تابانى تيگەن ساياحاتشىلار الدىمەن ءبىزدىڭ وسى ەرەكشەلىكتەرىمىزدى باسا ايتقان. سونىمەن قاتار ءبىز ابايدىڭ وشپەس تۋىندىسى - «قارا سوزدەردە» ايتىلعان ءوز كەمشىلىكتەرىمىزدى دە جاقسى بىلەمىز. ايتپاقشى، وسى ارادا مۇرات اۋەزوۆتىڭ «قارا سوزدەرگە» «عاقليات» دەگەن ەكىنشى اتاۋ بەرەيىك دەگەن ۇسىنىسىن قولدايتىنىمدى ايتا كەتەيىن»، - دەدى پرەزيدەنت رەسپۋبليكالىق «انا ءتىلى» باسىلىمىنا بەرگەن سۇحباتىندا.
مەملەكەت باسشىسى قوعامنىڭ ەڭبەككەرلەرگە دەگەن كوزقاراسىن وزگەرتۋ ماڭىزدىلىعىنا توقتالدى. «وكىنىشكە قاراي، كەيبىر جاعدايدا ءبىزدىڭ ەڭبەككە بايلانىستى قارىم-قاتىناسىمىزعا سىني كوزقاراسپەن قارايتىندار از ەمەس. بۇل جاعداي مەنىڭ كوڭىلىمە قاياۋ سالادى. ءبىز قوعامنىڭ ەڭبەككەرلەرگە دەگەن كوزقاراسىن تۇپكىلىكتى وزگەرتۋىمىز كەرەك. ءاربىر ەڭبەك قۇرمەتكە لايىق بولۋى قاجەت. سوندىقتان مەن «حالىق العىسى» دەگەن مەملەكەتتىك ناگرادا تاعايىندادىم. ال ەڭبەكتەگى تابىسى ءۇشىن بەرىلەتىن «ەڭبەك داڭقى» وردەنىنىڭ مارتەبەسىن كوتەرۋ جونىندە شەشىم قابىلدادىم»، - دەيدى قاسىم-جومارت توقايەۆ.
پرەزيدەنت بىلتىر اقورداعا مەكەمەلەر مەن اۋىلدارداعى قاراپايىم جۇمىسشىلاردى ارنايى شاقىرىپ، ماراپاتتاعانىن دا ەسكە الدى.
«ءبىز وسىنداي ەڭبەك ادامدارىنا دەگەن قۇرمەتتى ارتتىرىپ، ەل ءسۇيسىنىپ قارايتىنداي جاعداي جاساۋىمىز قاجەت. سول ارقىلى وسكەلەڭ ۇرپاق قوعامنىڭ قۇرمەتىنە بولەنۋ ءۇشىن جوعارى مەملەكەتتىك لاۋازىمداردى يەلەنبەي- اق، ءوز ءىسىن تىڭعىلىقتى، مۇقيات اتقارسا جەتكىلىكتى ەكەنىن تۇسىنۋگە ءتيىس. ۇكىمەت مەنىڭ تاپسىرمام بويىنشا جۇمىسپەن قامتۋدىڭ جول كارتاسىن ازىرلەدى. ونى ىسكە اسىرۋ ءۇشىن شامامەن 1 تريلليون تەڭگەگە دەيىن قارجى جۇمسالادى. جاقىندا مەن ۇكىمەتتىڭ ۋاقىتشا جۇمىس ورىندارىن اشۋعا عانا اۋەس بولىپ، تۇراقتى جۇمىس ورىندارىن كوپتەپ اشۋدى نازاردان شىعارىپ العانىن سىنعا الدىم. بۇگىندە ءبىزدىڭ ەلدە 2 ميلليونعا جۋىق ادام ءوزىن- ءوزى جۇمىسپەن قامتىپ وتىر. جۇمىسسىزدار سانى دا كوپ»، - دەدى ول.
قاسىم-جومارت توقايەۆ بۇل - وتە كۇردەلى الەۋمەتتىك ماسەلە ەكەنىن، ونى شۇعىل شەشپەسە بولمايتىنىن جەتكىزدى.
«ەڭبەككە باۋلۋ يدەولوگياسى اتاقتى اقىن-جازۋشىلارىمىزدىڭ شىعارماشىلىعىندا بارىنشا كورىنىس تاۋىپ، الدىڭعى قاتاردا ناسيحاتتالۋى كەرەك دەپ سانايمىن. قازىر «تويىڭ تويعا ۇلاسسىن» دەپ اندەتىپ، توي تويلاپ جۇرەتىن ۋاقىت ەمەس. بۇگىنگىدەي تەحنولوگيانىڭ زامانىندا توي- تومالاقتىڭ اڭگىمەسىن ايتىپ، ءبىر-ءبىرىن اسىرا ماقتاپ، اس ءىشىپ، اياق بوساتقانعا ريزا كەيىپتە ءجۇرۋ ادەتىنەن ارىلۋ كەرەك. ءتىپتى وسىنداي قاۋىپتى پاندەميا كەزىندە كەيبىر ازاماتتارىمىز ماعان حات جازىپ، توي وتكىزۋگە مۇمكىندىك بەرۋ كەرەك دەپ تالاپ قويادى. مەملەكەتتىڭ ءوزى ولەرمەندىكپەن ءومىر سۇرەتىن كەزگە كەلدىك. سوندىقتان ەڭبەك ەتۋ - ءومىر ءسۇرۋ سالتىنا اينالىپ، باستى مىندەت سانالۋعا ءتيىس. توي قۋالايتىن ەمەس، وي قۋالايتىن كەزەڭمەن بەتپە-بەت كەلدىك. بۇل ءداۋىر - اقىل-ويدىڭ، عىلىم مەن ءبىلىمنىڭ، ەڭبەكتىڭ ءداۋىرى!» - دەيدى قاسىم-جومارت توقايەۆ.
