كوروناۆيرۋس بويىنشا الەمدەگى احۋال: دەكسامەتازون تاپشىلىعى جانە ءولىم- ءجىتىمنىڭ ارتۋى
قازاقپارات بۇل تۋرالى bbc.com سايتىنا سىلتەمە جاساپ حابارلايدى.
د د ۇ باسشىسى تەدروس ادحانوم گەبرەيەسۋستىڭ ايتۋىنشا، دەكسامەتازونعا سۇرانىس وكسفورد ۋنيۆەرسيتەتىنىڭ عالىمدارى پرەپاراتقا جۇرگىزىلگەن زەرتتەۋ ناتيجەلەرىن جاريالاعاننان كەيىن بىردەن ارتقان.
كلينيكالىق سىناق كەزىندە ستاتسيونارداعى 2 مىڭعا جۋىق ناۋقاس اتالمىش پرەپاراتتى قابىلداعان.
انىقتالعانداي، وكپەنى جەلدەتۋ اپپاراتىنا قوسىلعان ناۋقاستار اراسىندا ءولىم جاعدايلارى - 40 تان 28 پايىزعا دەيىن، ال ەكستراكورپورالدىق مەمبراندى وكسيگەناتسياداعى (ە ك م و) ناۋقاستاردىڭ اراسىندا 25 تەن 20 پايىزعا ازايعان.
«ءبىز ءۇشىن كەلەسى سىناق - دەكسامەتازون ءوندىرىسىن ۇلعايتۋ، سونداي-اق ونى الەم بويىنشا جىلدام ءارى ءادىل تاراتۋ بولىپ وتىر. بۇل رەتتە، قاجەتتىلىك جوعارى ەلدەرگە باسىمدىق بەرىلەدى»، - دەدى د د ۇ باسشىسى.
ءمالىم ەتىلگەندەي، دەكسامەتازون مەديتسينادا 60 جىلدان بەرى قولدانىلىپ كەلەدى. ونىڭ قابىنۋعا قارسى اسەرى جوعارى. د د ۇ پرەپاراتتى تەك اۋىر جاعدايداعى ناۋقاستارعا جانە دارىگەرلەردىڭ باقىلاۋىمەن عانا بەرۋگە بولاتىنىن ەسكەرتەدى.
لاتىن امەريكاداعى ءولىم جاعدايلارى
دجونس حوپكينس ۋنيۆەرسيتەتىنىڭ دەرەكتەرىنە سايكەس، لاتىن امەريكا جانە كاريب باسسەينىنىڭ ەلدەرىندە كوروناۆيرۋستان قايتىس بولعاندار سانى 100 مىڭنان اسىپ جىعىلدى. ءولىم جاعدايلارىنىڭ جارتىسىنان استامى برازيليادا تىركەلدى. بۇل ەل ىندەتتى جۇقتىرۋ جانە ودان بولعان ءولىم وقيعالارى بويىنشا ا ق ش- تان كەيىن ەكىنشى ورىندا تۇر.
مەكسيكادا 23 مىڭنان استام ادام كوز جۇمدى. برازيليا جانە مەكسيكا كورشى ەلدەرى سياقتى قاتاڭ كارانتيندىك شارالاردى ەنگىزبەگەن بولاتىن. ءولىم-ءجىتىم جاعدايلارى، سونداي-اق پەرۋ جانە چيليدە كوپ - سايكەسىنشە 8,4 مىڭ جانە 4,5 مىڭ ادام. ساراپشىلاردىڭ پايىمىنشا، كەيبىر ەلدەر پاندەميانىڭ شارىقتاۋ شەگىنەن ءالى وتكەن جوق.
دەليدە جاڭا جاعدايلار ارتۋدا
ءۇندىستان استاناسى دەليدە ءبىر تاۋلىكتە 4 مىڭعا جۋىق ادامنان كوروناۆيرۋس انىقتالدى. بۇل، پاندەميا باستالعان ۋاقىتتان بەرگى ەڭ جوعارى كورسەتكىش. دەليدە بارلىعى 66 مىڭعا تارتا ادام ىندەتكە شالدىققان. سىرقات تانۋ ءوسىمى كۇن ساناپ ارتىپ كەلەدى.
بيلىك وكىلدەرى ادامداردىڭ ءجۇرىپ-تۇرۋىن جانە بايلانىستا بولعانداردى انىقتاۋدى ءجىتى باقىلاۋعا الاتىنىنا ۋادە ەتۋدە.
جۋىردا ءۇندىستان كارانتين شارالارىن جەڭىلدەتكەن بولاتىن. الايدا، ۆيرۋستىڭ تارالۋ قارقىنى باسىلار ەمەس. جالپى ەلدە كوروناۆيرۋس 440 مىڭنان استام ادامنان انىقتالدى.
14,4 مىڭ ناۋقاس قايتىس بولدى.
ەۋروپالىق وداق جانە مالديۆ ەلى تۋريستەردى قابىلداۋعا دايىن. نيۋ-يورك سۋعا شومىلۋعا رۇقسات بەرمەك
مالديۆ پرەزيدەنتى يبراگيم سوليح ءوز ەلى تۋريستەردى 15- شىلدەدەن باستاپ قابىلدايتىنىن مالىمدەدى. بۇل رەتتە، شەتەلدىك قوناقتارعا كوروناۆيرۋسقا تەست ناتيجەسىن كورسەتۋدىڭ قاجەتى جوق. مالديۆ ءۇشىن تۋريزم تابىستىڭ نەگىزگى كوزى بولىپ تابىلادى. پاندەميا سالدارىنان ناۋرىز ايىنان بەرى حالىقارالىق قاتىناس توقتاعان بولاتىن.
وسى ۋاقىتقا دەيىن كوروناۆيرۋس 2200 ادامنان انىقتالدى.
ەۋرووداق شەكارانى 1- شىلدەدەن باستاپ اشۋدى جوسپارلاپ وتىر. الايدا، كوروناۆيرۋس بويىنشا احۋال كۇردەلى ەلدەرمەن شەكارا جابىق كۇيىندە قالادى.
اتاپ ايتقاندا، ا ق ش پەن رەسەيدەن كەلەتىن تۋريستەردى ازىرگە كىرگىزبەۋ ۇسىنىلىپ وتىر. ە و ەلدەرى قانداي مەملەكەتتەردى قاۋىپسىز ساناۋعا بولاتىنىن انىقتايتىن كريتەرييلەردى ازىرلەۋى قاجەت.
نيۋ-يوركتە 1- شىلدەدەن جاعاجايدا سۋعا شومىلۋعا رۇقسات بەرىلمەك.
بۇل تۋرالى قالا مەرى بيلل دە بلازيو ءمالىم ەتكەن. «ساقتىقتى ۇمىتپايىق، جاعاجايدا دا الەۋمەتتىك قاشىقتىقتى ۇستانىپ، ماسكا تاعايىق»، - دەپ جازدى ول Twitter- دە.
قالادا جاعاجايلار 25- مامىردان باستاپ اشىلعانىمەن، شومىلۋعا تىيىم سالىنعان.
