الماتىدا دەمالىس كۇندەرى پوليتسيا كەزەكشىلىگى كۇشەيتىلەدى
بۇل تۋرالى ونلاين بريفينگ بارىسىندا اۋدان اكىمى بەكقالي تورعايەۆ ايتتى، دەپ حابارلايدى قازاقپارات ءتىلشىسى.
كەشە قازاقستاندا، ونىڭ ىشىندە الماتىدا ەپيدەميولوگيالىق جاعدايدى تۇراقتاندىرۋ ماقساتىندا قوسىمشا شارالار قابىلداندى. وسىعان بايلانىستى، الماتى قالاسىنىڭ المالى اۋدانىندا الداعى دەمالىس كۇندەرى، ياعني 20-21-ماۋسىمدا بارلىق ساۋدا، ويىن-ساۋىق ورتالىقتارى، ساۋدا ورتالىقتارى، ساۋدا ۇيلەرى، بازارلار، سۋپەرماركەتتەر، فيتنەس ورتالىقتاردىڭ جۇمىسى توقتاتىلادى. ءدامحانالار مەن مەيرامحانالار تەك قانا سانيتارلىق-ەپيدەميولوگيالىق نورمالاردى ساقتاي وتىرىپ، جازعى الاڭداردا عانا جۇمىس ىستەيتىن بولادى.
سونداي-اق ساياباقتارعا، جاعالاۋلارعا بارۋعا تىيىم سالىنادى. قوعامدىق كولىكتىڭ، ونىڭ ىشىندە قالا ماڭىنداعى مارشرۋتتاردىڭ جۇمىسى توقتاتىلادى.
«المالى اۋدانىندا 4 ساۋدا، ويىن- ساۋىق ورتالىعى، 18 ساۋدا ءۇيى، 7 ساۋدا ورتالىعى، 6 بازار، 43 فيتنەس- ورتالىق، 1 ساياباق، 22 تىنىمباق، 5 بۋلۆار، 15 جاسىل ايماق، 1 ءبولۋ ايماعى بار. قىزمەتى توقتاتىلعان بارلىق نىسانداردا سانيتارلىق- الدىن الۋ جانە ەپيدەمياعا قارسى ءىس- شارالار جۇرگىزىلەدى. الماتىلىقتارعا قالا بويىنشا ءجۇرۋدى شەكتەۋدى، اسىرەسە سىرقاتتانۋ ءقاۋپى قارت ادامدارعا ءتونىپ تۇر، سوندىقتان ۇيدە بولۋعا كەڭەس بەرەمىز. قالا تۇرعىندارىنان وسى باعىتتاعى شارالارعا تۇسىنىستىكپەن قاراۋلارىن سۇرايمىز»، - دەدى بەكقالي تورعايەۆ.
ايتا كەتۋ كەرەك، 18-ماۋسىم كۇنى ق ر پرەمەر- ءمينيسترى اسقار ماميننىڭ توراعالىعىمەن ق ر اۋماعىندا كوروناۆيرۋس ينفەكتسياسىنىڭ تارالۋىنا جول بەرمەۋ جونىندەگى ۆەدومستۆوارالىق كوميسسيانىڭ (ۆ ا ك) سەلەكتورلىق وتىرىسى ءوتتى. وندا ق ر پرەزيدەنتى قاسىم-جومارت توقايەۆتىڭ تاپسىرماسىنا سايكەس قازاقستانداعى ەپيدەميولوگيالىق جاعدايدى تۇراقتاندىرۋ بويىنشا قوسىمشا شارالار قابىلداندى. وسىعان بايلانىستى الماتى قالاسىنىڭ اكىمى كارانتيننىڭ كۇشەيتىلۋىنە قاتىستى مالىمدەمە جاساعان ەدى.
