كەيبىر وڭىرلەردە قوعامدىق ورىنداردىڭ جۇمىسى توقتاتىلادى - مينيسترلىك
بۇل تۋرالى ۇكىمەت وتىرىسىندا ق ر دەنساۋلىق ساقتاۋ ءمينيسترىنىڭ مىندەتىن اتقارۋشى ءلاززات اقتايەۆا ايتتى، دەپ حابارلايدى قازاقپارات ءتىلشىسى.
«ك ۆ ي سىرقاتتانۋشىلىعىنىڭ ءوسۋىن ەسكەرە وتىرىپ، كەشە، 18- ماۋسىمداعى ۆ ا ك شەشىمىمەن نۇر-سۇلتان جانە الماتى، قاراعاندى، شىمكەنت، پاۆلودار، ەكىباستۇز قالالارىندا الداعى دەمالىس كۇندەرى كارانتيندى كۇشەيتۋدىڭ قوسىمشا شارالارى قابىلداندى. اتاپ ايتقاندا 20-21- ماۋسىمدا: ساۋدا-ويىن-ساۋىق ورتالىقتارىنىڭ، ساۋدا ۇيلەرىنىڭ، ساۋدا جەلىلەرىنىڭ، جابىق ازىق-تۇلىك جانە ازىق-تۇلىك ەمەس بازارلاردىڭ قىزمەتى توقتاتىلادى؛ قوعامدىق تاماقتانۋ وبەكتىلەرىنىڭ جۇمىسى الەۋمەتتىك قاشىقتىقتى ساقتاي وتىرىپ، اشىق اۋادا كوشە فورماتىندا عانا رۇقسات ەتىلەدى؛ قوعامدىق كولىكتىڭ جۇمىسى شەكتەلەدى؛ فيتنەس ورتالىقتارىنىڭ قىزمەتى توقتاتىلادى؛ 65 جاستان اسقان ادامداردىڭ كوشەگە شىعۋى شەكتەلەدى»، - دەدى ول.
سونىمەن قاتار، ونىڭ ايتۋىنشا، جوعارىدا اتالعان قالالارعا جاقىن ورنالاسقان تۋريستىك ايماقتارعا كىرۋ جابىلادى. سونداي-اق، وڭىرلەردىڭ 50 مىڭنان استام حالقى بار ەلدى مەكەندەرىندە: قوعامدىق ورىنداردىڭ جۇمىسى توقتالادى؛ تۋريستىك ايماقتاردا تۇراتىن ادامدارعا الەۋمەتتىك قاشىقتىقتى ساقتاۋ ۇسىنىلادى؛ 65 جاستان اسقان ادامداردىڭ كوشەگە شىعۋى شەكتەلەدى»، - دەدى ءلاززات اقتايەۆا.
