ءۇش ايلىق ۇزىلىستەن كەيىن يسپانيادا فۋتبول قايتا جانداندى

ەستەرىڭىزگە سالا كەتەلىك، يسپانيا چەمپيوناتى الەمدى جايلاعان كوروناۆيرۋس پانتەمياسىنىڭ الدىن الۋ ماقساتىندا 8- ناۋرىزدان كەيىن كەيىنگە شەگەرىلگەن ەدى. كوماندالار 28-تۋر ويىندارىن 11-14- ماۋسىم ارالىعىندا وتكىزدى.

يسپانيا پرەمەراسىندا ۇنەمى كوش باسىندا جۇرەتىن «بارسەلونا» مەن «رەال مادريد» كلۋبتارى بۇل جولى دا كەزەكتى جەڭىسىنە جەتتى.

«بارسەلونا» 13- ماۋسىمدا سىرت الاڭدا «مايوركا» كومانداسىن ويسىراتا جەڭدى. ولار الاڭ يەلەرى قاقپاسىنا جاۋاپسىز ءتورت گول سوقتى. اتالعان كەزدەسۋدە «بارسەلونا» ساپىنان ارتۋرو ۆيدال 2، مارتين برايتۆايت 37، جوردي البا 79، ليونەل مەسسي 93-مينۋتتاردا قارسىلاستار قاقپاسىن ءدال كوزدەدى.

وسىلايشا «بارسەلونا» 4:0 ەسەبىمەن جەڭىسكە جەتتى. ال «رەال مادريد» بۇگىن ءوز الاڭىندا «ەيبار» كومانداسىنان 3:1 ەسەبىمەن باسىم ءتۇستى.

كورولدىك كلۋب ساپىنان توني كرووس 4، سەرحيو راموس 30, مارسەلو 37-مينۋتتاردا مەرگەندىك تانىتتى. وعان «ەيبار» ويىنشىسى پەدرو بيگاس 60-مينۋتتا جالعىز گولمەن جاۋاپ قايىردى.

اتالعان تۋردان كەيىن تۋرنير كەستەسىندە وزگەرىس بولعان جوق. «بارسەلونا» 28 ويىننان كەيىن 61 ۇپايمەن بۇرىنعىسىنشا كوش باسىندا تۇرسا، ودان نەبارى ءۇش ۇپاي كەم جيناعان «رەال مادريد» ەكىنشى ورىندا كەلەدى. كەلەسى تۋر 15-18- ماۋسىم كۇندەرى ارالىعىندا وتكىزىلەدى.

بۇل جولى ءوز الاڭىندا «بارسەلونا» «لەگانەستى»، «رەال مادريد» «ۆالەنسيانى» قابىلدايدى. سونداي-اق، فۋتبولدان يتاليا چەمپيوناتى 20- ماۋسىمدا قايتا جالعاسادى.

ال فۋتبولدان انگليا پرەمەر-ليگاسى 17- ماۋسىمدا باستالادى. گەرمانيا بىرىنشىلىگى مامىر ايىنىڭ ورتاسىنان باستاپ وتكىزىلىپ كەلەدى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى