ەكپەنىڭ ارقاسىندا كوپتەگەن اۋرۋلار تىيىلدى - دارىگەر يممۋنولوگ
بۇل بۇگىنگى تاڭدا قوعام اراسىندا قىزۋ پىكىرتالاس تۋدىرىپ وتىرعان ماسەلەلەردىڭ ءبىرى.
وسى رەتتە ءبىز مامان رەتىندە الماتىداعى № 11-ەمحانانىڭ يممۋنولوگ دارىگەرى قاتيا تاجييەۆانىڭ پىكىرىن بىلگەندى ءجون كوردىك. 25 -جىل بويى بالا دارىگەرى جانە يممۋنولوگ بولىپ قىزمەت ەتىپ كەلە جاتقان قاتيا تاجيەۆا قازىرگى تاڭدا ەكپەمەن باسقارىلاتىن جۇقپالى اۋرۋلاردىڭ 10 نان استام ءتۇرى بارىن ايتتى.
«سوڭعى جىلدارى ديفتەريا، سال، سىرەسپە، كوكجوتەل اۋرۋلارىنان ءولىم-ءجىتىم جوقتىڭ قاسى. بۇل ناتيجەگە كوپ جىلدار بويى جاسالعان بەلسەندى ۆاكسيناتسيالاۋدىڭ ارقاسىندا جەتىپ وتىرمىز. بالالاردا بۇرىن ءجيى كەزدەسەتىن پنيەۆمونيا، ۆيرۋستى گەپاتيتتىڭ ا ءتۇرى اۋرۋى دا كۇرت ازايدى. قازىرگى كۇنى ەكپەدەن باس تارتۋ قاجەت دەگەن پىكىرلەر دە ايتىلىپ قالىپ جاتىر.
ونىڭ نەگىزگى سەبەبى، اتا-انالاردىڭ دۇرىس اقپارات الماعاندىعىنان جانە اتالعان جۇقپالى اۋرۋلاردى ومىرىندە مۇلدە كەزدەستىرمەگەندىگىنەن دەپ تۇسىنەمىن. ءبىز مەديتسينا قىزمەتكەرلەرى تاجىريبەمىزدە اۋرۋلاردىڭ كوپتەگەن ءتۇرىن، سونىڭ ىشىندە سال اۋرۋىنان كەيىنگى پارەز- پاراليچپەن مۇگەدەك بولعان ناۋقاستار، كوكجوتەل اۋرۋىنىڭ اۋىر فورماسىندا قۇلاق، كوز، مۇرىننان قان كەتۋلەرمەن قاتار ۇستامالى جوتەلدىڭ 5-6 ايعا دەيىن سوزىلۋى، قىزىلشا اۋرۋىنان ەنسەفاليتكە، مەنينگيتكە اسقىنۋلار، قىزامىق (كراسنۋحا) جۇقپاسىن جۇقتىرعان جۇكتى ايەلدىڭ كوپتەگەن اقاۋلارمەن (تاڭداي مەن ۇستىڭگى ەرىننىڭ بىتىسپەۋى، جۇرەكتىڭ تۋا بىتكەن اقاۋى) ءسابيدى دۇنيەگە اكەلۋى سياقتى جاعدايلار وتە كوپ كەزدەستىردىك. مۇنداي مىسالدى مىڭداپ كەلتىرۋگە بولادى»، - دەدى مامان.
دارىگەر ەكپەنىڭ كەرى اسەرلەرى دە بولاتىنىن، الايدا ول ناۋقاستىڭ دەنساۋلىعىن دۇرىس باعالاي بىلمەگەننەن بولاتىنىن ايتادى.
«شىنىمەن دە ۆاكسيناتسيادان كەيىن كەزدەسەتىن جاعىمسىز اسەرلەردى جوققا شىعارمايمىز. ەكپەگە كەلگەن بالانىڭ دەنساۋلىعىن دارىگەر جيىنتىقتى دۇرىس باعالاپ ەگىلەتىن بولسا جاعىمسىز اسەرلەر بولمايدى. ءبىراق كەز كەلگەن اۋرۋدى ەكپەمەن بايلانىستىرۋ دۇرىس ەمەس. د س پ، اۋتيزم، ميعا قان قۇيىلۋ سياقتى اۋرۋلار قۇرساقىشىلىك ينفەكسيانىڭ سالدارىنان، جۇكتىلىك كەزىندەگى سىرتقى، ىشكى فاكتورلاردان دامۋى ابدەن مۇمكىن. سوندىقتان مەن پەدياتر، يممۋنولوگ، كوپبالالى انا رەتىندە ەكپە ەگۋدىڭ بالا دەنساۋلىعى ءۇشىن وتە ماڭىزدى ەكەنىن ايتقىم كەلەدى! اۋىرىپ ەم ىزدەگەنشە، اۋىرمايتىن جول ىزدەيىك»، - دەدى №11-قالالىق ەمحانانىڭ يممۋنولوگ دارىگەرى تاجيەۆا قاتيا.
اۆتور: گۇلميرا عوسمانالي
