ەلوردا عيماراتتارىنىڭ سىرتىندا ماڭگىلىك الاۋ تۇتاندى
سونداي-اق ساعات 22:00 دە قالا تۇرعىندارى ءوز ۇيلەرىنىڭ بالكونىنان ءبىر مەزگىلدە شام جاقتى، دەپ حابارلايدى قازاقپارات ءتىلشىسى.
«جەڭىستىڭ 75 جىلدىعىن مەرەكەلەۋ اياسىندا شىعارماشىل جاستار «ماڭگىلىك الاۋ» اكسياسىن ۇيىمداستىردى. وسى ورايدا «ق ت ج»، «بارىس ارەنا»، «نۇر الەم» عيماراتتارى سەكىلدى شاھارداعى ماڭىزدى نىسانداردى قامتۋعا تىرىستىق. سونىمەن قاتار، قالا تۇرعىندارىن پاتەرلەرىنىڭ بالكونىنا شىعىپ، كارانتين رەجيمى كەزىندە اتاۋلى داتاعا وراي بارلىق ارداگەرلەرگە قۇرمەت كورسەتۋگە شاقىردىق»، - دەدى يدەيا اۆتورى، جاس پروديۋسەر ازات ابىكەن.
ونىڭ سوزىنە قاراعاندا، بۇل اكسيا وزگە دە ەلدەرگە تارالادى.
«اكسيا 8-مامىردا ۇيىمداستىرىلدى، سەبەبى ءبىز ۆيدەوماتەريال دايىنداپ جاتىرمىز. ەرتەڭ ونى بارشا تەلەارنالاردان كورسەتەدى. بۇدان بولەك، ەلشىلىكتەر ارقىلى بارشا ماتەريال باسقا ەلدەرگە دە تارالادى. بۇل تۇرعىدا ازەربايجان، ارمەنيا، بەلارۋس، ۋكراينا سەكىلدى ەلدەر شاراعا قاتىستى وزدەرىنىڭ جىلى لەبىزدەرىن ءبىلدىردى. ولار اكسيانى، ياعني قازاقستاندا جەڭىس كۇنى قالاي اتالىپ وتكەنىن وزدەرىنىڭ تەلەارنالارىنان كورسەتۋدى جوسپارلاپ وتىر»، - دەدى ول.
«سوڭعى كەزدەرى بارشا الەمدە ادامنىڭ كوڭىل كۇيىن تۇسىرەتىن اقپارات كوبەيىپ كەتتى. وسى جىل بارشا ادامزات ءۇشىن ۇلكەن سىناق بولدى. بۇل رەتتە ادامداردىڭ كوڭىل- كۇيىن كوتەرگىمىز كەلدى. سوندىقتان اتالعان يدەيامىزدى جۇزەگە اسىرۋ تۋرالى شەشىم جاسادىق»، - دەپ ءتۇسىندىردى ول.
ايتا كەتەيىك، شاعىرماشىل جاستار عيماراتتاردا ماڭگىلىك الاۋدى بەينەلەۋدەن بولەك، ەلورداداعى تۇرعىن ءۇي كەشەندەرىنىڭ بىرىندە تۇرعىندار ءۇشىن كونسەرتتىك باعدارلاما دايىندادى. وسى شارا اياسىندا ازاماتتاردى كارانتين رەجيمىن ساقتاپ، ۇيدە وتىرۋعا شاقىردى.
اۆتور: رۋسلان عابباسوۆ
