سوعىستا تالاي ديۆيزيالار ءبىر تاۋلىكتە جويىلىپ كەتكەن - ايدوس سارىم
بۇل تۋرالى ونلاين كونفەرەنسيادا بەلگىلى ساياساتتانۋشى ايدوس سارىم ءمالىم ەتتى، دەپ حابارلايدى قازاقپاراتت ءتىلشىسى.
بۇگىن جەڭىستىڭ 75 جىلدىعىنا وراي «ءبىلىم- يننوۆاتسيا» حالىقارالىق قوعامدىق قورى جانە «edLight Education Support Center» ج ش س-نىڭ ۇيىمداستىرۋىمەن «ۇرپاققا ۇران بولعان ۇلى ەرلىك» اتتى رەسپۋبليكالىق عىلىمي- پراكتيكالىق ونلاين كونفەرەنسيا ءوتتى.
«ءبىز ەلىمىزدە ءوز تاۋەلسىزدىگىمىزگە قول جەتكىزىپ، ءوز تاريحىمىزدى ايتاتىن، جازاتىن، زەرتتەيتىن زامانعان كەلدىك. گەرمانيامەن سوعىس ءبىرشاما زەرتتەلگەن بولسا، ءبىزدىڭ قازاقتاردىڭ كەڭەس- فين سوعىسىنا قالاي قاتىسقانى جايىندا تەرەڭ زەرتتەلمەگەن. سونىمەن قاتار، جاپونيادا قالاي سوعىستىق دەگەن اڭگىمەلەر ايتىلماعان. سوعىس دەگەنىمىز - مايدانعا اتتانعان ازاماتتاردىڭ ەرلىگى. كەزىندە بىزگە تەك جاقسى جاعىن عانا كورسەتۋگە تىرىستى. نەگىزى، وسى سوعىستىڭ قاراپايىم كۇندەرى بار. كەيبىر ديۆيزيالارىمىز ءتورت ادامعا ءبىر مىلتىق بەرىپ، سوعىسقا قاتىسقان. تالاي ديۆيزيالار ءبىر تاۋلىكتە جويىلىپ كەتكەن كۇندەر بار»، - دەدى ساياساتتانۋشى.
وسى ورايدا ا. سارىم تاريحتى دۇرىس زەرتتەۋ كەرەكتىگىن اتاپ ءوتتى. بۇل تۇرعىدا سوعىستا جۇرگەن ازاماتتار كۇندەلىكتى ءومىرىن قالاي وتكىزگەنىن تىڭعىلىقتى زەرتتەۋ قاجەت.
«ەكىنشى ۇلكەن ەرلىگىمىز - ول تىلداعى ازاماتتاردىڭ، انالارىمىزدىڭ، اجەلەرىمىزدىڭ جانقيارلىق ەڭبەگى. سوعىس جاعدايىندا كۇندەلىكتى ومىردە شىرىلداپ وتىرعان بالاعا نانىن تاۋىپ بەرۋ، ودان كەيىن زاۋىتقا نەمەسە قىرمانعا بارىپ جۇمىس ىستەۋ - بۇل دا ۇلكەن ەرلىك. وسى جاعىن دا كوپ ايتا بەرمەيمىز، از-ماز كينولارىمىز ءارى شىعارمالارىمىز بار. بىزدە سوعىس تاقىرىبى تەك سونى كورگەن ادامداردىڭ عانا يەلىگى بولىپ قالدى. ءبىز نەگە قيالدامايمىز، ءبىز نەگە ويلانبايمىز؟»، - دەدى ول.
سونىمەن قاتار ساياساتتانۋشى قازىر الەمدە «جادىلار سوعىسى»، «تاريح سوعىسى» دەگەن تاقىرىپتار پايدا بولعانىن ايتتى. رەسەي تاريح تاقىرىبىنا، ونىڭ ىشىندە ەكىنشى دۇنيەجۇزىلىك سوعىس تاقىرىبىنا ايرىقشا ءمان بەرىپ وتىر. «جالپى، بۇل تاقىرىپتا ءوزىمىزدىڭ جولىمىزدى تابۋىمىز كەرەك سياقتى. مەنىڭشە، 9-مامىر تەك قۋانىش كۇنى ەمەس. شىنداپ كەلگەندە، اتا- بابالارىمىزدى ەسكە الىپ، مەشىتكە بارۋ كەرەك. ءبىز بۇل كۇندەازا تۇتىپ، ياعني ىشتەي ويلانىپ، سوعىستىڭ بولماۋىن تىلەۋىمىز قاجەت. وسى ورايدا ءتيىستى كوزقاراستى قالىپتاستىرعان دۇرىس بولار»، - دەدى ا. سارىم.
ونىڭ اتاپ وتۋىنشە، الداعى ۋاقىتتا سوعىستا، اشارشىلىقتا جوعالعان ادامداردى ىزدەپ تابۋعا ءمان بەرۋ كەرەك. بۇل رەتتە ارحيۆتىك جۇمىستاردى جانداندىرۋ شارالارى كۇتىپ تۇر. «ءبىز ۇنەمى ءوزىمىزدىڭ جولىمىزدى ءبىلىپ، ءوزىمىزدىڭ ۇلتتىق مۇددەمىزدى ەشقاشان ەستەن شاعارماۋىمىز كەرەك. شىنىمەن دە سوعىستا ۇلكەن ەرلىك تە، ۇلكەن قيانات تا بولدى. وڭاي جەڭىل- جەلپى تۇجىرىمدامالارعا بەرىلمەي، ءوزىمىزدىڭ ۇلكەن تۇجىرىممەن كەلىپ، ەستەلىكتەردى جيناۋعا ءمان بەرگەن ءجون»، - دەدى ايدوس سارىم.
اۆتور: رۋسلان عابباسوۆ
