سوتتالۋشىنىڭ قولىنان مەرت بولعان تۇرمە قىزمەتكەرىنىڭ وتباسىنا ماتەريالدىق كومەك كورسەتىلدى
پاۆلودار زاڭ كوللەدجىن ۇزدىك ءبىتىرىپ، قولىنا قىزىل ديپلوم العان ولگا ۆاسيليەۆسكايا كوكشەتاۋ قالاسىنداعى قونىس كولونياسىندا جاساق باستىعى بولىپ قىزمەت اتقاردى. رۋحى مىقتى، ادال دا ەرجۇرەك، قايسار قىز ءوزىنىڭ جاستىعىنا قاراماستان جۇمىسقا دەگەن تالاپشىلدىعى مەن ەڭبەكقورلىعىنىڭ ارقاسىندا ارىپتەستەرىنىڭ اراسىندا ۇلكەن بەدەلگە يە بولدى.
كوڭىلى جارقىن، سەرتىنە بەرىك، عۇمىرىن شىنايى ەڭبەككە ارناعان جاس لەيتەنانت ولگاعا ارىپتەستەرىنەن بولەك، سوتتالعاندار دا قۇرمەتپەن قارايتىن. الايدا، ونىڭ ءومىرى قىسقا بولدى. تۇزەۋ مەكەمەسىندە جازاسىن وتەپ جاتقان «قۇبىجىق» اتتى سوتتالۋشىنىڭ قولىنان كوز جۇمدى. وتان قورعاۋشى كۇنى اقمولا وبلىسى بويىنشا قىلمىستىق اتقارۋ جۇيەسى دەپارتامەنتىنىڭ وكىلدەرى ولگا ۆاسيليەۆسكايانىڭ وتباسىنا بارىپ، اناسى ەلەنا كونستانتينوۆناعا ماتەريالدىق كومەك كورسەتتى. «ءبىز اقمولا وبلىستىق قىلمىستىق اتقارۋ جۇيەسى دەپارتامەنتىنىڭ جەكە قۇرامى انتقا ادال، دوسقا بەرىك ارىپتەسىمىزدىڭ جارقىن بەينەسىن ۇمىتپايمىز. ول وسى جولدا ايانباي ەڭبەك ەتىپ كەلە جاتتى. سپورتتى ءسۇيدى، مانسابىن جاقسى قۇرۋعا تىرىستى. ول تۋرالى ارىپتەستەرى تەك وڭ سوزدەر عانا ايتادى»، - دەدى قىلمىستىق اتقارۋ جۇيەسى دەپارتامەنتى باستىعىنىڭ ورىنباسارى مارات ءابدىراحمانوۆ.
ولگانىڭ ومىردەن وزعانىنا 10 جىل وتسە دە، ونىڭ جارقىن بەينەسى ارىپتەستەرىنىڭ كوز الدىندا. بۇگىنگى تاڭدا دەپارتامەنت اۋماعىندا وعان ەسكەرتكىش مەموريال تاقتا ورناتىلعان. ونىڭ قۇرمەتىنە جىل سايىن دەپارتامەنت قىزمەتكەرلەرىنىڭ قاتىسۋىمەن باسكەتبولدان جارىس ۇيىمداستىرىلىپ تۇرادى.
«ول سپورتقا جاقىن قىز بولاتىن، ۆولەيبول، باسكەتبولدى جاقسى كورەتىن، پاۆلودار زاڭ كوللەدجىندە ۆولەيبول كومانداسى كاپيتانى بولدى»، - دەپ ەسكە الدى كادرلار قىزمەتى بولىمشەسىنىڭ باستىعى دينارا مۇستافينا.
اناسى ەلەنا كونستانتينوۆنا ءوزىن قولداپ كەلگەن قىلمىستىق اتقارۋ جۇيەسى دەپارتامەنتىنىڭ قىزمەتكەرلەرىنە انالىق العىسىن ايتتى.
اۆتور: اسلان وسپانوۆ
