يزرايلدە كوروناۆيرۋستان قورعايتىن كرەم پايدا بولدى

ونلاين قىزمەتتەر مەن قورعانۋ زاتتارىن جاساپ شىعارۋعا ەرەكشە كوڭىل ءبولىندى.

ءماجبۇرلى وقشاۋلاۋ ادامداردى تابىس تابۋدىڭ جاڭا جولىن ىزدەۋگە جانە عالىمداردى تىڭ زەرتتەۋلەر جاساۋعا يتەرمەلەدە. كوروناۆيرۋس پايدا بولعانعا دەيىن ونەركاسىپ ەمدىك كوسمەتيكا شىعارۋمەن اينالىسقان. ىندەت زاۋىتتىڭ جۇمىسىنا قاتتى اسەر ەتە قويماعانمەن زەرتحانا باسشىسى لەونيد لۋرەنى تىڭ ويلارعا جەتەلەدى.

ەكى اكادەميالىق دارەجەسى بار حيميا مامانى ادامداردىڭ ۆيرۋستان ءتۇرلى زارارسىزداندىرعىش ارقىلى قورعانىپ جاتقانىن كورەدى. ولار ءسوز جوق ءتيىمدى. ءبىراق ونىڭ قورعاۋ قاسيەتى 5 مينۋتتان ءارى سوزىلمايدى. وسىلايشا عالىم قولدى مەديتسينالىق قولعاپتان كەم قورعامايتىن كرەم ويلاپ تابادى. بۇل كرەم تەحنولوگياسىنىڭ باستى ءمانى وندا باكتەريا مەن ۆيرۋستى جوياتىن ميكروبولشەكتەر بار. ءبىراق سانيتايزەردەن ايىرماشىلىعى قولعا جاققان سپيرت الاقاندى تازارتقاننان كەيىن ۇشىپ كەتسە، كرەم ۇزاق ۋاقىتقا ساقتالادى.

لەونيد لۋرە، تەحنولوگيانى جاساپ شىعارۋشى:

- بۇل كرەم نەمەسە گەل تۇرىندەگى زارارسىزداندىرعىش تەرىگە جاعىلعان سوڭ 1-2 ساعات كەتپەيدى. ياعني ول تەرىنى ۆيرۋستان ۇزاعىراق قورعايدى.

قازىر كرەمدى جاساپ شىعارۋشىلار ونى قالاي اتايتىنىن ءالى شەشە الماي جاتىر. ال يزرايلدىڭ دەنساۋلىق ساقتاۋ مينيسترلىگى جاڭا كرەمدى تەكسەرۋگە كىرىسىپ كەتتى. ال مىنا بيزنەس- يدەيانى كيىم ديزاينەرى ناستيا ويلاپ تاپتى. ول ىندەت ەندى تارالا باستاعاندا، ساياحاتتان ورالىپ ۇشاقتا ماسكا كيۋگە ءماجبۇر بولادى. ءبىراق وزگە ادامدار سياقتى دۇرىس دەمالا الماي، بەتپەردەدەن ءبىراز قيىنشىلىق كورەدى.

ناستيا ۆيتەبسكايا، كيىم ديزاينەرى:

- مەن ماتالاردىڭ تەحنيكالىق سيپاتتاماسىن زەرتتەپ، وزىمە قاجەتتىسىن تاپتىم. سودان ىڭعايلى ماسكا تىگىپ الۋ يدەياسى پايدا بولدى.

ناستيانى مۇنداي ارەكەتكە بەتپەردە تاپشىلىعى دا يتەرمەلەدى. ول الدىمەن وزىنە، سودان كەيىن قىزى مەن كۇيەۋىنە ماسكا تىككەن. ونىڭ ارنايى قوسپاسى بار ماتامەن تىگىلگەن ماسكاسىمەن ەركىن دەمالۋعا بولادى.

ناستيا ۆيتەبسكايا، كيىم ديزاينەرى:

- ءبىز 4 ءتۇرلى ماسكا جاسادىق. كىشكەنتاي بالالارعا ارنالعان. ويتكەنى ستاندارتتىق ولشەم ولاردىڭ بەتىنە كەلمەيدى. ەر ادامدارعا دا بولەك بەتپەردە تىكتىك. جانە ايەلدەرگە ارنالعان ماسكالار بار. جالپى ماسكانى تاققاندا ادام ونى سەزبەۋى كەرەك دەپ ويلايمىن.

پاندەميا كوروناۆيرۋس يندۋسترياسىنىڭ دامۋىنا جول اشتى. ادامدار ماسكا مەن قورعانۋ كيىمدەرىن تىگىپ، ءتۇرلى سانيتايزەرلەر شىعارىپ جاتىر. سونداي- اق قاشىقتان وقىتۋ مەن ءتۇرلى ونلاين قىزمەتى دە جانداندى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى