ونلاين ايتىسىنىڭ جەڭىمپازدارى انىقتالدى

جىر الامانى ءۇش اپتادان استام ۋاقىت ونلاين رەجيمدە ءوتتى. وعان ەلىمىزدىڭ ءار وڭىرىنەن 16 اقىن قاتىستى.

«ونلاين ايتىس قالاي بولادى ەكەن، حالىق قالاي قابىلدار ەكەن دەپ ويلانىپ ەدىم. قۇدايعا شۇكىر، ايتىس جارقىراپ كورىندى. قازاق تابيعاتىنان اقىن حالىق. سول اقىندىعىن وسى جولى كورسەتتى. مەنى قاتتى قۋانتقانى - ءبىزدىڭ ايتىستىڭ ورەسى بيىكتەي باستاعانى. وسى اتى جامان نارسە تەزىرەك كەتسە ەكەن دەپ تىلەيمىن. وسىنداي قيىن ساتتە حالىق ۇيدە وتىرعاندا ءبىزدىڭ ايتىسكەرلەر جارق ەتە قالدى. جاس بولسا دا، كەلەلى ويلار ايتتى، حالقىنىڭ كوكەيىنەن شىعاتىن اقىلدى سوزدەر ايتتى. مەن ءوزىم ريزامىن. بۇل جولعى ايتىستىڭ ەرەكشەلىگى - قاتىسۋشىلاردىڭ باعاسىنا ارالاسقان جوقپىز، ايتىستىڭ تورەشىسى حالىق بولدى. شىن جۇرەكتەن ءادىل باعالارىڭىزعا، قولداۋلارىڭىزعا العىس ايتامىن»، - دەدى قازىلار القاسىنىڭ ءتوراعاسى مىرزاتاي جولداسبەكوۆ ANTIKOR پاراقشاسىندا وتكەن بريفينگىدە.

باس جۇلدە ءۇشىن ەلوردالىق بەك شىمات پەن شىمكەنتتىك بەكجان بازاربەك تارتىسقا ءتۇستى.

كورەرمەندەر شەشىمىمەن ەلوردالىق بەك شىمات جەڭىسكە جەتىپ، التىن-وردا ديزاين ءۇيىنىڭ «ءتاڭىرى» ەكسكليۋزيۆتى ەتنو-ينستالياتسياسىن الدى.

بەكجان بازاربەك ءبىرىنشى ورىنعا 400000 تەڭگە اقشالاي سىيلىق الدى. كورەرمەندەردىڭ داۋىس بەرۋى ارقىلى ەكىنشى ورىنعا جانە 300000 تەڭگە اقشالاي سىيلىققا نۇربول جاۋىنبايەۆ يە بولدى.

ءۇشىنشى ورىن مەن 200000 تەڭگە جۇلدە نارتاي تىلەۋقۇلعا بەرىلدى.

سونىمەن بىرگە، مىرزاتاي جولداسبەكوۆ ءار قاتىسۋشىعا ءوزىنىڭ سەگىز تومدىق شىعارمالار جيناعىن تارتۋ ەتتى.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى