ازىرەت سۇلتان مەشىتىندە مىڭ وتباسىعا تەگىن ازىق- تۇلىك تاراتىلدى

اتالعان باستاما - ەلوردا اۋماعىنداعى 12 مەشىتتىڭ بىرىككەن قايىرىمدىلىق شاراسى. «قازاقستان مۇسىلماندارى ءدىني باسقارماسىنىڭ ءتوراعاسى، باس ءمۇفتي ناۋرىزباي قاجى تاعان ۇلى قاسيەتتى رامازان ايىندا جانە كارانتيندە مۇقتاج جاندارعا كومەكتەسۋ تۋرالى باستاما كوتەرگەن ەدى. قايىرىمدىلىق باستاماسى بىزدە عانا ەمەس، ەلىمىزدىڭ بارلىق مەشىتتەرىندە جالعاسىن تاۋىپ جاتىر. ءار مەشىت ءوز كولەمىنە، قاراجاتىنا قاراي كومەكتەسەدى. بۇگىنگى شارا - ەلوردا اۋماعىنداعى 12 مەشىتتىڭ بىرلەسە ۇيىمداستىرۋىمەن، دەمەۋشى ازاماتتاردىڭ ۇيىتقى بولۋىمەن جۇزەگە استى»، - دەدى ازىرەت سۇلتان مەشىتىنىڭ باسپا ءسوز حاتشىسى ايدوس يمانتاي قازاقپارات تىلشىسىنە بەرگەن سۇحباتىندا.

ازىق- تۇلىك سومكەلەرى مەشىتتەرگە جۇگىنگەن مۇقتاج جاندار ءتىزىمى بويىنشا تاراتىلادى. «بۇعان دەيىن مەشىتكە كومەككە جۇگىنگەن كوپبالالى، مۇقتاج، اسىراۋشىسىنان ايىرىلعان جاندار بار. ولار ءوز جاعدايىن ايعاقتايتىن ارنايى قۇجات وتكىزگەن. ەلوردا مەشىتتەرىندەگى تىزىمدەردى قاراستىرىپ، مىڭ وتباسىنا حابارلاستىق جانە ەڭ قاجەتتى دەگەن ازىق- تۇلىك سومكەسىن ازىرلەدىك»، - دەدى ا. يمانتاي.

اۆتور: ايجان سەرىكجان قىزى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى