كوگەرشىن- پوشتاشى جايلى قىزىق دەرەكتەر

مۇنى ەجەلگى ادامدار دا بايقاعان. سودان كوگەرشىندى پوشتاشى «قىزمەتىنە» الىپ، قارىم- قاتىناس قۇرالىنا اينالدىرعان. پوشتا تاسۋعا باسقا قۇستاردى دا ۇيرەتۋگە بولادى. ءبىراق حاتشىلىق كوگەرشىننىڭ قانىندا بار قاسيەت. ونى ۇيرەتىپ قاجەت ەمەس. قاناتىنا حاتتى بايلاپ، ۇشىرىپ جىبەرسەڭ بولدى - تۋعان جەرىن اينىماي تابادى. كوگەرشىننىڭ كەمشىلىگى تەك ءبىر باعىتتا عانا، ياعني، ۇيىنە قاراي ۇشاتىنى عانا. فرانسۋزدار شاعالانى، ورىستار سۇڭقاردى، اعىلشىندار قارلىعاشتى پوشتا تاسۋعا ۇيرەتىپ كورگەن. الايدا ولار كوگەرشىندەي كورسەتكىش كورسەتە المادى. كوگەرشىن جىلدام، اۋا رايىنا قارامايدى. كوگەرشىندى قولعا ۇيرەتۋدىڭ تاريحىنا كەلسەك، ءبارى كونە گرەكتەردەن باستالعانىن كورەمىز. كونە گرەكيادا ادامدار كوگەرشىندى تۋعان جەرىنەن ۇستاپ اكەتىپ، حات بايلاپ قايتا ۇشىرىپ جىبەرەتىن. ماسەلەن، وليمپيادا ويىندارىنىڭ جۇلدەگەرىن كوگەرشىن ارقىلى ەلىنە حابارلاعان. 1176 -جىلى مىسىردا نۇراددين پاتشانىڭ كەزىندە رەسمي تۇردە مەملەكەتتىك كوگەرشىن پوشتا قىزمەتى قۇرىلعان. ال فرانسۋزدار كوگەرشىندى 1870-71 ج. ج. بولعان فرانسۋز- نەمىس (نەمىستەردىڭ ول كەزدەگى مەملەكەتىنىڭ اتاۋى - پرۋسسيا) سوعىسىندا ءجيى پايدالانعان. ءتىپتى، نەمىستەر حابارشىنىڭ جولىن كەسۋ ءۇشىن قارشىعانى جىبەرىپ، كوگەرشىندى ولتىرتەتىن. ءبىراق فرانسۋزدار مۇنىڭ دا امالىن تاپقان ەكەن.

كوگەرشىننىڭ تۇياعىنا كىشكەنتاي ىسقىرىق تاعىپ جىبەرەتىن. ىسقىرىق قۇس ۇشقان كەزدە، اۋاعا ۇيكەلىپ، اشى دىبىس شىعارادى. بۇدان جىرتقىش قۇستار قورقاتىن كورىنەدى. قازىرگى ۇلى بريتانيا، بۇرىنعى انگليادا ءبىرىنشى دۇنيەجۇزىلىك سوعىس كەزىندە كوگەرشىن پوشتاشىلاردىڭ بىرىنە ارميا پولكوۆنيگى اتاعى بەرىلگەن ەكەن. ال كوز جۇمعان كەزدە شەنىمەن بىرگە ارۋلاپ كومگەن. ⅩⅨعاسىردىڭ اياعىندا گاۆاي ارالدارىندا حات- حابار جەتكىزۋ ۇلكەن ماسەلە بولعان. ويتكەنى مۇحيت كەشىپ وتكەنگە كەمە جوق، از. ارال تۇرعىندارى كوگەرشىندى سول كەزدە قولدانا باستاعان. پوشتاشى قۇسپەن حات تا، اقشا دا جىبەرگەن ەكەن. رەسەيدە 1890 -جىلى پوشتاشى كوگەرشىندەردىڭ قوعامى قۇرىلىپ، سپورتتىق جارىستار ۇيىمداستىرىلعان. «سپورتشى كوگەرشىندەردىڭ حابارشىسى» («ۆەستنيك گولۋبينوگو سپورتا» ) اتتى جۋرنال شىعارىلعان. ريەۆوليۋتسيادان كەيىنگى جىلدارى ماسكەۋدە دوماشكيەۆ ەسىمدى قۇسشىنىڭ اتاعى جەر جارىپ، باپتاعان كوگەرشىندەرى بىرىنەن كەيىن ءبىرى ەرلىك كورسەتكەن ەكەن. ماسەلەن، دوماشكيەۆتىڭ كوگەرشىندەرىنىڭ ءبىرى 1929 -جىلى ك س ر و- دا رەكورد ورناتىپ، 537 شاقىرىم جەردى 6 ساعات 8 مينۋتتا ۇشىپ جەتكەن.

كوگەرشىن ورتا ەسەپپەن 86 شاقىرىم/ساعات جىلدامدىقپەن ۇشقان. قازىر كوممۋنيكاتسيانىڭ دامىعان زامانى. ⅩⅩعاسىر لوگيستيكانىڭ عاسىرى بولسا،ХХІ عاسىر - اقپارات پەن كوممۋنيكاتسيانىڭ عاسىرى. الەمنىڭ كەز كەلگەن جەرىنە حات جىبەرۋ قاس قاعىم. الايدا پوشتاشى كوگەرشىندەردىڭ عۇمىرى تاۋسىلعان ۋاقىت دەسەك، قاتەلەسەمىز. ماسەلەن، اعىلشىننىڭ پليمۋت قالاسىنىڭ دارىگەرلەرى كلينيكاداعى قان تالداماسىن لابوراتورياعا كوگەرشىنمەن جىبەرەدى. كلينيكا مەن زەرتحانانىڭ اراسى جاپ- جاقىن، ءبىراق كولىك كەپتەلىسىنىڭ كەسىرىنەن دارىگەرلەر ساراپتاما قورىتىندىسىن دەر كەزىندە جەتكىزە الماي قينالاتىن كورىنەدى. ال ءۇندىستان ءالى كۇنگە دەيىن شالعاي ەلدىمەكەندەرگە كوگەرشىنمەن پوشتا جەتكىزەدى.

Massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى