تۇركىستان وبلىسىندا سۋ تاسقىنىنان كەلگەن شىعىن تولىق وتەلە مە؟
بيلىك باسشىلارى تاسقىن سۋ ورىن العان اۋىلداردىڭ حالقىمەن كەزدەسىپ، ءتۇسىندىرۋ جۇمىستارىن جۇرگىزۋدە. ماقتاارال اۋدانىنىڭ اكىمى باقىت اسانوۆ تاسقىن سۋ استىندا قالعان اۋىلداردىڭ تۇرعىندارىمەن جۇزدەستى. قاۋىپسىز اۋماققا كوشىرىلگەن حالىققا ۇكىمەت تاراپىنان ناقتى كومەك كورسەتىلەتىنىن اتاپ كورسەتتى.
تۇركىستان وبلىسىنداعى تاسقىنعا بايلانىستى قۇرىلعان مەملەكەتتىك كوميسسياعا توپان سۋدان كەلگەن شىعىندى ەسەپتەپ، اۋىلداردى قالپىنا كەلتىرۋ، ينجەنەرلىك جەلىلەردى جوندەۋ جانە زارداپ شەككەن حالىققا الەۋمەتتىك كومەك كورسەتۋ جۇكتەلگەن.
سونىمەن قاتار، زارداپ شەككەن اۋىل ازاماتتارىنىڭ ءارقايسىسىنا وتەماقى تولەنەدى.
وزبەكستانمەن شەكارالاس ورنالاسقان ماقتاارال اۋدانىنداعى 5 اۋىلدىڭ 845 ءۇيىن سۋ باستى. جەڭىس، ورگەباس، دوستىق، جاڭاتۇرمىس، فيردوۋسي اۋىلدارىنداعى اپاتتى جويۋعا مىڭعا جۋىق قۇتقارۋشى مەن 200 دەي تەحنيكا تارتىلعان. سونداي-اق، سۋ استىندا قالعان اۋىلداردىڭ كىرەبەرىسىنە بلوك- بەكەتتەر قويىلىپ، جوسىپ كەتكەن جۇرتتىڭ دۇنيە- مۇلكىن ءتارتىپ ساقشىلارى كۇزەتۋدە. اۋدانداعى 7639 گەكتار ەگىندىك قىزىل سۋدىڭ استىندا قالعان. بۇل القاپتىڭ باسىم بولىگىنە ماقتا ەگىلىلگەن. ماماندار ناقتى شىعىن كولەمىن انىقتاۋ ۇستىندە.
سۋ العان اۋىلداردىڭ ىرگەسىندە ورنالاسقان تاعى 5 ەلدىمەكەندى وبلىس اكىمدىگى، وبلىستىق توتەنشە جاعدايلار دەپارتامەنتى، قازسۋشار جانە اۋىل تۇرعىندارىنان قۇرالعان ۆولونتەرلەردىڭ كومەگىمەن سۋ باسۋ قاۋپىنەن شىعارىلدى.
سونىڭ ىشىندە اتاپ وتەتىن ستراتەگيالىق ماڭىزى زور 14 مىڭنان استام حالقى بار مىرزاكەنت ەلدىمەكەنى قىزىل سۋ باسۋدان امان قالدى.
جەرلەستەرىمەن جۇزدەسكەن ماقتاارال اۋدانىنىڭ اكىمى الەۋمەتتىك جەلىلەر، مەسسەندجەرلەر مەن باق ارقىلى تاراپ جاتقان سۋ تاسقىنى جونىندەگى ءتۇرلى بۇرمالاۋشىلىقتارعا قاتىستى ءوز پىكىرىن ءبىلدىردى.
«حالىق دۇرىس، ياعني، رەسمي شىنايى اقپارات الۋى كەرەك. ب ا ق- تا، اسىرەسە الەۋمەتتىك جەلىلەردە اۋماقتاعى جاعدايعا قاتىستى ەلدى دۇرلىكتىرەتىن جالعان اقپاراتتار تارالىپ جاتىر. ەڭ باستىسى، ادام شىعىنىنان امانبىز. ال، شىعىندار ەسەپتەلىپ، تولىق وتەلەدى. جان-جاقتان كومەك كورسەتىپ جاتقان جەرلەستەرىمىزگە راحمەت ايتامىن. ورىن العان جاعدايدا جالپى جاۋاپكەرشىلىك بولۋى قاجەت، سونىڭ ىشىندە جۋرناليستەر دە ءوز جۇمىسىنا جاۋاپكەرشىلىكپەن قاراسا ەكەن»، - دەدى اۋدان باسشىسى.
باقىت اسانوۆ جالعان اقپارات تاراتقانى ءۇشىن اكىمشىلىك جانە قىلمىستىق جاۋاپكەرشىلىككە تارتىلاتىندىعىن ەسكەرتتى. ماقتاارال اۋدانىنداعى 24 ەۆاكۋاتسيا ورىندارىنداعى 3500 گە جۋىق تۇرعىننىڭ بۇگىنگى جاي-كۇيى ءبىرقالىپتى.
بارلىعى دەرلىك مەديتسينالىق تەكسەرىستەن وتكىزىلىپ، جاتىن ورىن مەن كورپە- توسەكپەن تەگىس قامتىلعان. ولارعا كۇنىنە ءۇش مەزگىل تاماق ۇلەستىرىلۋدە. ازىق- تۇلىك پەن جەكە باس گيگيەناسىن ساقتاۋعا قاجەتتى كەرەك- جاراقتىڭ ءبارى جەتكىزىلىپ بەرىلۋدە. ال، وزگە دە قاجەتتى زاتتار مەن ازىق- تۇلىك تۇرلەرى ءاربىر ەۆاكۋاتسيا ورىندارىنا توتەنشە جاعدايعا بايلانىستى جاساقتالعان ورتالىق قويمادان ءتىزىم ارقىلى ۇلەستىرىلۋدە. ەۆاكۋاتسيا ورىندارى بوپ بەكىتىلگەن مەكتەپتەر مەن كوللەدج، مەشىتتەردە ورنالاسقان تۇرعىندار وسىنداي قيىن-قىستاۋ كەزەڭدە قول ۇشىن سوزىپ جاتقان مەملەكەت باسشىلىعىنا، ۇكىمەتكە، وبلىس، اۋدان باسشىلىقتارىنا جانە بارلىق قازاقستاندىقتارعا شىنايى العىستارىن ايتۋدا.
