كوروناۆيرۋسكە شالدىققاندارعا روبوتتار قىزمەت ەتەدى

تەمىر قىزمەتكەرلەر تازالاۋ جانە زارارسىزداندىرۋ جۇمىستارىن جۇرگىزەدى. سونداي- اق ناۋقاستاردىڭ ەم- دومىنا كومەكتەسەدى.

«قوناق ءۇيدى مەيلىنشە جايلى ەتۋ ءۇشىن روبوتتاردى قولدانۋدى ۇيعاردىق. ماسەلەن، مەيمانحانانىڭ كىرەبەرىسىنە تازالاۋ جۇمىسىمەن اينالىساتىن روبوتتى قويدىق. ويتكەنى ەڭ قاۋىپتى ايماق ءدال وسى جەر سانالادى. ونىڭ ۇستىنە روبوتتاردىڭ ارقاسىندا ادامدار ۆيرۋس جۇقتىرىپ الامىن دەپ تە قورىقپايدى»، - دەيدى توكيو مەرياسىنىڭ وكىلى ناوكو كۋبوتا.

ءوز كەزەگىندە تۇركيا قوناقۇيلەرى ساقتىق شارالارىن مەيلىنشە كۇشەيتىپ، تۇرالاپ تۇرعان تۋريزم سالاسىن قايتا جانداندىرۋعا كىرىستى.

ياعني قوناقۇيلەر بۇدان بىلاي تەك «قاۋىپسىزدىك سەرتيفيكاتىمەن» جۇمىس ىستەيدى. ال كەلۋشىلەر كوروناۆيرۋس جۇقتىرماعانى تۋرالى انىقتاما كورسەتۋلەرى كەرەك. بۇعان قوسا، الەۋمەتتىك اراقاشىقتىقتى ساقتاۋ دا مىندەتتى. وسىعان بايلانىستى قىزمەتكەرلەرگە ارنايى ەپيدەميولوگيالىق دايارلىقتان ءوتۋ تالابى قويىلدى.

«قاۋىپسىزدىك سەرتيفيكاتى بەرىلگەن ساتتەپ باستاپ قىزمەتكەرلەردى دايىنداۋعا كىرىسەمىز. چەشمەدەگى ماۋسىم تەك بارلىق تالاپتارعا ساي بولعانىمىزدا عانا باستالادى. تۇرعىن ءۇيدى جالعا بەرۋ سەرۆيسىندە دە ءبىرشاما وزگەرىس بار. مامىردان باستاپ پاتەر يەلەرى بولمەنى تازالاۋ جۇمىستارىنا قوناق كەتكەننەن كەيىن 24 ساعاتتان سوڭ عانا كىرىسە الادى. بۇعان قوسا، ءۇيدى كەلەسى جالعا الۋشىعا تاپسىرۋ ءۇشىن كەمىندە 3 تاۋلىك ءوتۋى ءتيىس»، - چەشمە قالاسىنىڭ مەرى ەكرەم وران. كوروناۆيرۋس كەسىرىنەن نيۋ-يورك قوناقۇيلەرى دە كەلۋشىلەرگە جاڭا شەكتەۋلەر ەنگىزۋگە ءماجبۇر. ەندى مەيمانحانا تابالدىرىعىنان اتتاعان ءاربىر قوناق مىندەتتى تۇردە دەنە قىزۋىنا تەكسەرىلۋى ءتيىس.

ال ليفتپەن تەك ءبىر ادامنان عانا كوتەرىلە الادى. بۇعان قوسا، بولمەلەردى تازالاپ، دەزينفەكتسيالاۋعا بەرىلەتىن ۋاقىت ادەتتەگى 2 ساعاتتان 3 تاۋلىككە دەيىن ۇزارعان.

«ءبىز كەلگەن قوناقتاردىڭ تەمپەراتۋراسىن تەكسەرىپ، حال- جاعدايىن سۇرايمىز. ەگەر ءبارى دۇرىس بولسا، قولدارىنا زارارسىزداندىرعىش ۇستاتىپ، تولىق تەكسەرىلگەنى تۋرالى ستيكەر بەرەمىز. مۇنداي قاعازدىڭ ءتۇسى كۇن سايىن وزگەرتىلىپ تۇرادى. ءبىز جاڭادان ەنگىزىلىپ جاتقان شارالار ادامدارعا تۇسىنىكتى بولۋى ءۇشىن بارىنشا قاراپايىم ەتۋگە كۇش سالدىق»، - دەيدى قوناق ءۇي مەنەدجەرى رۋدي تاۋشەر.

فوتو: twitter.com/TPM

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى