ق ر پرەزيدەنتى: قازاقستان ءۇشىن قىتاي نارىعى - ۇلكەن مۇمكىندىك
بۇل تۋرالى «مير» تەلەارناسىنا سۇحبات بەرگەن ق ر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
«قازاقستان قىتاي حالىق رەسپۋبليكاسىمەن جاڭا ءوزارا ءتيىمدى قارىم- قاتىناس قۇرۋعا نيەتتى. قازاقستاندىق «نۇرلى جول« باعدارلاماسى مەن قىتايدىڭ «جىبەك جولى» ەكونوميكالىق بەلدەۋى ستراتەگياسى كوپ جاعدايدا تۇيىسەدى جانە تۇسپا- تۇس كەلەدى دەۋگە دە بولادى.
«جىبەك جولى» ەكونوميكالىق بەلدەۋىن قۇرۋ يدەياسى 2013 -جىلى قىتاي كوشباسشىسى شي جينپيننىڭ قازاقستانعا ساپارى بارىسىندا العاش رەت ايتىلعان ەدى. وتكەن جىلدىڭ كۇزىندە بەيجىڭگە ساپارىم بارىسىندا ءتوراعا شي جينپينمەن ساۋدا بايلانىستارىمىزدى كەڭەيتۋ تاقىرىبىنا ۇلكەن نازار اۋداردىق. بۇگىنگى كۇنى قىتاي قازاقستاننىڭ ەڭ ءىرى سىرتقى ساۋدا سەرىكتەسى جانە ەكونيميكالىق سەرىكتەسى سانالادى»، - دەدى مەملەكەت باسشىسى.
قازاقستان پرەزيدەنتىنىڭ دەرەگىنشە، ەكى ەلدىڭ اراسىنداعى تاۋار اينالىمىنىڭ كولەمى شامامەن 14,5 ميلليارد دوللاردى قۇرايدى. سوڭعى جىلدارى دا تاۋار اينالىمى ەكى ءماندى سان توڭىرەگىندە بولىپ وتىر. 2018 -جىلى ءوسىم قارقىنى 11,5، ال 2019 -جىلى 23 -پايىزعا جەتتى.
«قازاقستان ءۇشىن قىتاي نارىعى ۇلكەن مۇمكىندىك بەرەدى. مۇنى قازىر عانا ايتىپ ءوتتىم. قىتاي قازاقستاندىق ەنەرگيا رەسۋرستاردىڭ ءداستۇرلى تۇتىنۋشىسى سانالادى جانە سوڭعى جىلدارى تەرەڭ وڭدەلگەن قازاقستاندىق تاۋارلار جەتكىزىلىمى ارتىپ كەلە جاتقانى بايقالادى. ءبىزدىڭ شىعىستاعى كورشىمىز قازاقستاننىڭ ەكولوگيالىق تازا ازىق- تۇلىك ونىمدەرىن ۇلكەن سۇرانىسپەن پايدالانادى. بۇعان قوسا، ءبىز قىتايدى ازيا- تىنىق مۇحيتى ءوڭىرى ەلدەرىنىڭ نارىعىنا تاۋارلارىمىزدى شىعارۋ ءۇشىن ترانزيتتىك ايماق رەتىندە قاراستىرامىز. قىتايدان تاۋارلار تەڭىز جولى ارقىلى ەۋروپاعا 40 جانە ودان دا كوپ كۇندە جەتكىزىلەدى. ال قازاقستان مەن رەسەي ارقىلى قۇرلىق جولىمەن نە ءبارى 15 كۇندە»، - دەدى قاسىم- جومارت توقايەۆ. مەملەكەت باسشىسىنىڭ اتاپ وتۋىنشە، قازاقستاننىڭ قىتايمەن ساۋدا- ساتتىعىنىڭ ۇلەسى جالپى تاۋار اينالىمىنىڭ 15 پايىزىن قۇرايدى. ال قىتايدان تارتىلعان ينۆەستيتسيا ۇلەسى 7 پايىز بولىپ وتىر.
