جامان ءۇيدى قوناعى بيلەيدى - ابايەۆ ميتينگىلەرگە شەتەلدىكتەردى قاتىستىرۋ جايلى
ايتا كەتسەك «اشىق ديالوگ» باعدارلاماسىندا مينيسترگە «بەيبىت جينالىستار تۋرالى زاڭ جوباسى حالىقارالىق ستاندارتتارعا ءالى دە ساي ەمەستىگى تۋرالى ادام قۇقىعىن قورعاۋ ۇيىمدارى سىن ايتۋدا. بۇعان قاتىستى نە ايتار ەدىڭىز؟» دەگەن سۇراق قويىلدى.
«ەڭ الدىمەن، ادام قۇقىعىن قورعاۋ ۇيىمدارىنىڭ ءبارى دە بۇل پوزيتسيانى ۇستاپ وتىر دەپ ايتا الماس ەدىم. ءيا، زاڭ جوباسىن جۇيەلى تۇردە سىناپ كەلە جاتقاندارى بار. كەيدە سولار ءۇشىن ءبارىن بۇرىنعى قالىپتا قالدىرىپ، 1995 -جىلعى زاڭمەن ءومىر سۇرە بەرگەن ىڭعايلى بولار ما ەدى دەگەن سەزىم دە تۋىندايدى. ايتسە دە، زاڭ جوباسىنىڭ پروگرەسسيۆتىلىگىن سانالى تۇردە شەتتەۋ - مەنىڭشە، بۇرىس ستراتەگيا. سەبەبى زاڭ دايىنداۋ - ساۋدا ءىسى ەمەس. ءبىز ۇكىمەت اتىنان ۇلتتىق مۇددە، ۇلتتىق قاۋىپسىزدىكتى، ەل اۋماعىنىڭ تۇتاستىعىن ساۋداعا سالىپ وتىرعان جوقپىز»، - دەدى مينيستر.
داۋرەن ابايەۆ ءوز سوزىندە قۇقىق ماماندارىنىڭ كەيبىرى شەتەل ازاماتتارىنا ميتينگىلەرگە قاتىسۋ قۇقىعىن بەرۋ تۋرالى ۇسىنىس ءبىلدىرىپ جاتقانىن ەسكە الدى. «البەتتە، ءبارىن ءتۇسىنىپ وتىرمىز. ءتىپتى حالىقارالىق ستاتۋتتاردىڭ دا وسىنى تالاپ ەتىپ وتىرعانىنا حاباردارمىز. دەگەنمەن، قازاقتا «جامان ءۇيدى قوناعى بيلەيدى» دەگەن جاقسى ءسوز بار. ءبىز ارينە، قوناعىن قۇدايداي سىيلاعان حالىقپىز. ءبىراق، قوناق قويدان جۋاس بولۋى كەرەك»، - دەدى ول.
مينيستر زاڭدى قابىلداۋ ماسەلەسىندە قاۋىپتەردىڭ ءبارىن، ەلدىڭ ەرەكشەلىگىن، اۋماقتىق جاعدايىن، حالىقتىڭ ساياسي مادەنيەتى مەن قۇرىلىمىن، ەتنوستىق قۇرامى مەن ءدىنىن، كونفەسسياسىن ەسكەرۋ كەرەكتىگىن ايتىپ ءوتتى. «مەنىڭ ويىمشا، شەتەلدىكتەرگە ميتينگكە قاتىسۋ قۇقىعىن بەرۋ - ءالى ەرتە. الايدا، وسىناۋ جاعدايدا كوڭىلگە كىربىڭدى باسقا جاي ۇيالاتادى: وسى اڭگىمەلەردىڭ ارتىندا زاڭ جوباسىنا ەنگىزىلگەن وتە ماڭىزدى جاڭاشىلدىقتار كورىنبەي قالدى. ەڭ باستىسى - ەسكەرتۋ ءتارتىبى ەنگىزىلدى. بۇل پروگرەس ەمەس پە؟ ەندى ميتينگ وتكىزۋ ءۇشىن تەك ەسكەرتۋ جازساڭىز بولعانى. ەشقانداي رۇقسات الۋدىڭ قاجەتى جوق. بەيبىت جيىنداردى وتكىزۋدە پرەزۋمپتسيا قاعيداتى ەنگىزىلدى. زاڭمەن تىكەلەي وتكىزۋگە تىيىم سالىنعان جەردەن باسقا پيكەتتەردى كەز كەلگەن ورىندا وتكىزۋ قۇقىعى بەرىلدى. ەسكەرتۋدى بەرۋدىڭ مەرزىمى قىسقارتىلدى. ميتينگكە قاتىسۋشىلاردىڭ سانى بويىنشا شەكتەۋلەردىڭ ءبارى الىنىپ تاستالدى. سول سەبەپتى زاڭ جوباسىنا جالپى كوزقاراسپەن قاراپ باعا بەرگەن ابزال»، - دەيدى داۋرەن ابايەۆ.
