اكىمدەر ەل باسشىلىعىنىڭ تاپسىرماسىن سۇلەسوق ورىنداپ وتىر
بۇل تۋرالى ونلاين بريفينگ بارىسىندا ق ر سىبايلاس جەمقورلىققا قارسى ءىس-قيمىل اگەنتتىگى ستراتەگيا جانە جەدەل باسقارۋ دەپارتامەنتىنىڭ باسشىسى نۇرلان جاقسىمبەتوۆ ايتتى، دەپ حابارلايدى قازاقپارات ءتىلشىسى.
«بۇگىندە قازاقستاندا مەملەكەتتىك قىزمەتتەردىڭ 88 پايىزى ەلەكتروندى تۇردە كورسەتىلەدى. ءبىر قاراعاندا، قوماقتى كورسەتكىش. ءبىراق، بيزنەس ءۇشىن جوعارى جەمقورلىق تاۋەكەلدەر ناقتى مەملەكەتتىك ورگاندار قاعاز تۇرىندە عانا كورسەتەتىن قالعان 12 پايىز قىزمەتتەردە جاتىر. ەڭ الدىمەن ولار: جەر قاتىناستارى، ساۋلەت، قۇرىلىس جانە اۋىل شارۋاشىلىعى تاۋارلارىن وندىرۋشىلەرگە سۋبسيديا بەرۋ كەزىندە اۋىل شارۋاشىلىعى»، - دەدى ول.
ونىڭ اتاپ وتۋىنشە، بوس جەر ۋچاسكەلەرى تۋرالى اشىق مالىمەتتەردىڭ بولماۋى ۇلكەن پروبلەماعا اينالعان. سەبەبى بۇل قازاقستاندىق جانە شەتەلدىك ينۆەستورلار ءۇشىن بيزنەس- جوبالارىن جوسپارلاۋداعى ماڭىزدى ماسەلەنىڭ ءبىرى سانالادى.
«ەل باسشىلىعىنىڭ بىرنەشە رەت جەر قورى تۋرالى ءبىرىڭعاي مالىمەتتەر بازاسىن قۇرۋدى تاپسىرعانىنا قاراماستان اكىمدىكتەر ءالى كۇنگە دەيىن بۇل تاپسىرماعا وتە سۇلەسوق قاراپ كەلەدى. وڭىرلەردە قۇرىلعان گەوپورتالدار اشىعىن ايتقاندا ينۆەستورلار ءۇشىن مۇلدەم پايداسىز»، - دەدى نۇرلان جاقسىمبەتوۆ. ونىڭ اتاپ وتۋىنشە، كاسىپكەرلەر تاراپىنا تابيعي مونوپوليالار سۋبەكتىلەرىنىڭ قىزمەتىنە قاتىستى دا شاعىم كوپ. بيزنەسىن ەندى باستاعان ءاربىر كاسىپكەر سۋ، جىلۋ، گاز تارتۋدا قيىندىقتارعا تاپ بولىپ جاتادى.
اۆتور: مارلان جيەمباي
