نۇر-سۇلتان اكىمى ازاماتتاردى ونلاين قابىلدادى
بۇگىن ەلوردا اكىمى التاي كولگىنوۆ ازاماتتاردى ونلاين-فورماتتا جەكە قابىلدادى، دەپ حابارلايدىڭ قازاقپارات اكىمدىكتىڭ رەسمي سايتىنا سىلتەمە جاساپ.
تۇرعىندار تۇرعىن ءۇي باعدارلامالارىنا قاتىسۋ، الەۋمەتتىك كومەك الۋ، قۇرىلىسى ۇزاققا سوزىلعان نىسانداردىڭ قۇرىلىسىن اياقتاۋ، سپورت سالاسىن دامىتۋ، جۇمىسقا ورنالاسۋ جانە ت. ب. ماسەلەلەردى كوتەردى.
«وسىنداي قيىن-قىستاۋ كەزدە ءبىزدى جالعىز قالدىرماي، كومەك كورسەتكەندەرىڭىز ءۇشىن العىس بىلدىرەمىز. 42,5 مىڭ تەڭگە كولەمىندەگى الەۋمەتتىك كومەكتى الدىق. Nur Otan پارتياسى دا كومەك كورسەتىپ، 50 مىڭ تەڭگە اۋداردى. اكىمدىك پەن ەرىكتىلەر دە كومەكتەستى، ازىق-تۇلىك پەن مەديتسينالىق ماسكالاردى اكەلدى. شارالاردىڭ بارلىعى ۋاقىتىلى كورسەتىلدى. ازاماتتاردى قابىلداۋ توقتاپ قالماي، وتكىزىلە بەرگەنى دۇرىس. كەرى بايلانىستى سەزىنەمىز»، - دەدى قالا تۇرعىندارى ونلاين قابىلداۋ بارىسىندا.
مەملەكەت باسشىسىنىڭ تاپسىرماسىنا سايكەس 42,5 مىڭ تەڭگە كولەمىندە الەۋمەتتىك تولەم الۋشىلاردىڭ ءتىزىمى كەڭەيتىلدى. 29- ساۋىردەگى دەرەكتەرگە سايكەس ەلوردادا 42,5 مىڭ تەڭگە كولەمىندەگى الەۋمەتتىك تولەمدى 284 مىڭنان استام ادام الدى، بۇل 12 ميلليارد تەڭگەدەن استام قاراجات.
ەلباسىنىڭ تاپسىرماسىنا سايكەس قالادا ءبىرىنشى كەزەڭ اياسىندا 14,5 مىڭ تۇرعىن 50 مىڭ تەڭگە كولەمىندە ماتەريالدىق كومەك الدى.
ەكىنشى كەزەڭ بويىنشا تولەم بەرۋ باستالدى. 28 مىڭنان استام تۇرعىنعا شامامەن 1,4 ميلليارد تەڭگە كولەمىندە ماتەريالدىق كومەك كورسەتىلەدى. كومەكتى از قامتىلعان وتباسىلار، ەرەكشە قاجەتتىلىگى بار تۇرعىندار (1,2 توپتاعى ەرەكشە قاجەتتىلىگى بار ازاماتتار، ەرەكشە قاجەتتىلىگى بار زەينەتكەرلەر، اتاۋلى الەۋمەتتىك كومەك الاتىن تۇرعىندار)، ەرەكشە قاجەتتىلىگى بار بالانى كۇتۋمەن اينالىساتىن اتا- انالار (ا ا ك الۋشىلار)، زەينەتكەرلەر (ەڭ تومەنگى جانە تومەن زەينەتاقى الاتىندار)، جەتىمدەر، ۇلى وتان سوعىسىنىڭ قاتىسۋشىلارى، ۇلى وتان سوعىسىنىڭ مۇگەدەكتەرى جانە ولارعا تەڭەستىرىلگەن تۇلعالار، تىل ەڭبەككەرلەرى الادى.
حالىقتى قولداۋدىڭ باسقا دا شارالارى قولعا الىندى. اتاۋلى الەۋمەتتىك كومەك كورسەتىلىپ، ازىق-تۇلىك سەبەتتەرى مەن مەديتسينالىق ماسكالار تاراتىلىپ جاتىر. ازاماتتاردى ونلاين-فورماتتا قابىلداۋ تۇراقتى نەگىزدە وتكىزىلەدى.
