قازاقستاندا تاۋلىگىنە قانشا ماسكا شىعارىلادى

«س ك- فارماتسيا» ج ش س باسقارما ءتوراعاسى بەرىك ءشارىپ وسىنداي مالىمەتتى جاريا ەتتى، دەپ حابارلايدى قازاقپارات ءتىلشىسى.

«بۇرىن قازاقستاندا مەديتسينالىق ماسكاعا دەگەن قاجەتتىلىك - جىلىنا 30 ميلليون بولسا، قازىر بۇل سۇرانىس بىرنەشە ەسە وسكەنىن تۇسىنگەن ابزال. ءبىز جىل سايىن شامامەن 15 ميلليون ماسكا ساتىپ الىپ كەلگەنبىز. ال بيىل 19,7 ميلليون ماسكانىڭ كەلىسىمىنە قول قويىلدى. ونىڭ ىشىندە 9 ميلليونىن ايماقتارعا جولداپ، سونداعى مەديتسينالىق ۇيىمدارعا تاراتتىق. ماسكانىڭ دا ءتۇر- ءتۇرى بار: ءۇش نەمەسە ءتورت قاباتتى بولۋى ىقتيمال. ءبىز ماسكانى كەپىلدەندىرىلگەن تەگىن مەديتسينالىق كومەكتىڭ كولەمى بويىنشا جەتكىزەمىز. بۇرىن مەديتسينالىق پرەپاراتتارعا سۇرانىس كوپ بولماعانىمەن، بۇگىنگى كۇنى كۇرت ارتقان. قازاقستاندا تاۋلىگىنە 1 ميلليون ماسكا شىعارىلىپ جاتىر. الايدا ونىڭ ىشىندە سەرتيفيكاتتالعان، تازا مەديتسينالىق ماسكا سانى - 300 مىڭ عانا. 300 مىڭ ماسكا - جوسپارلى ءارى بولجامدى قۋاتتىلىق بولاتىن» ، - دەدى بەرىك ءشارىپ سىبايلاس جەمقورلىققا قارسى ءىس- قيمىل اگەنتتىگىنىڭ Facebook پاراقشاسىندا وتكەن جيىندا.

بۇرىن قازاقستان ورتا ەسەپپەن ماسكانى شەتتەن 18 تەڭگەگە ساتىپ الىپ كەلسە، قازىر حالىقارالىق نارىقتا ونىڭ باعاسى شامامەن 150 تەڭگەگە دەيىن قىمباتتاعان.

«بىزگە نەلىكتەن ماسكا نەگە 118 تەڭگە تۇرادى دەگەن ءۋاج ءجيى ايتىلادى. ءبىز ونى 106,9 تەڭگەگە ساتىپ الدىق. ول كەزدە لوگيستيكا دا توقتاپ قالعان ەدى. شۇعىل كەرەكتىگىن ەسكەرىپ، الدىردىق. البەتتە، مۇنىڭ ءبارى تۇپكى باعاعا اسەر ەتپەي قويمايدى» ، - دەدى بەرىك ءشارىپ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى