س ق و پوليتسەيلەرى جوعالعان جىلقىلاردى درونمەن ىزدەدى
س ق و ايىرتاۋ اۋدانىنىڭ پوليتسەيلەرى اۋدان ورتالىعى ساۋمالكول اۋىلى تۇرعىندارىنىڭ العىسىن ارقالادى. 21-ءساۋىر كۇنى جىلقى وسىرۋمەن اينالىساتىن اۋىل تۇرعىندارى گاليتسينو اۋىلىنىڭ ماڭىندا ەركىن جايىلىمدا جۇرگەن تابىننان 13 جىلقىنىڭ جوعالعانىن انىقتايدى. ولار جىلقىلاردى ءۇش كۇن بويى وزدەرى ىزدەپ، تابا الماي، اۋداندىق پوليتسيا بولىمىنە جۇگىنەدى. ىزدەۋ توبى قۇرىلىپ، اۆتوكولىك بولىنەدى.
شال اقىن اۋدانىنا قاراي بەت العان توپ ىزدەۋ جۇمىسىنا كۆادروكوپتەر پايدالانعان، ونى اۋداندىق پوليتسيا ءبولىمىنىڭ اعا كريميناليسى ءىلياس قۇنانباي باسقارعان. اتالعان تەحنيكامەن ەكى جىلداي جۇمىس ىستەگەن ءىلياس - تاجىريبەلى وپەراتور.
ءىز-ءتۇزسىز جوعالعان ادامداردى ىزدەستىرۋگە كومەكتەسۋ ءۇشىن ول كۆادروكوپتەرمەن ساعاتتاپ جۇمىس ىستەگەن.
ىزدەۋگە ەكى تاۋلىك جۇمسالعان، ىزدەۋ توبى جوعالعان جەردەن كورشى اۋداننىڭ اۋماعىنا دەيىن شامامەن 100 شاقىرىم ءجۇرىپ وتكەن. درون ءجۇرىپ ءوتۋى قيىن ورماندى جەردە پايدالانىلدى. ول اۋادا 25 مينۋت بولىپ، 8 شاقىرىمداي جەر ۇشقان.
الايدا، جىلقىلار قىراعى باقتاشىلاردىڭ كومەگىمەن تابىلدى. پوليتسەيلەر كوپ جىلقىلاردىڭ جوعالعانى تۋرالى ولاردى الدىن الا حاباردار ەتكەن. باقتاشىلاردىڭ بىرىنەن كەلىپ تۇسكەن قوڭىراۋ مال يەلەرىن جىلقىلاردىڭ ىزىنە ءتۇسىردى.
«جىلقىلاردىڭ ەركىن جايىلىمنان جوعالۋى - ءجيى كەزدەسەتىن جاعداي، - دەپ اتاپ ءوتتى ايىرتاۋ اۋدانى پوليتسيا ءبولىمىنىڭ باسشىسى ابىلعازى عابدۋللين.
- وسىنداي جاعدايلاردى، سونداي-اق مال ۇرلىعى فاكتىلەرىن بولدىرماۋ ءۇشىن اۋىل تۇرعىندارى مالىن باقتاشىنىڭ قاراۋىنا تاپسىرعانى ءجون. وسى ماقساتتا مال يەلەرى، باقتاشىلار جانە جەرگىلىكتى اتقارۋشى ورگاندار اراسىندا ءۇشجاقتى شارت جاسالۋى ءتيىس».
جىلقى يەلەرى الەۋمەتتىك جەلىلەردە جىلقىلارىن ەكى تاۋلىك بويى كۇنى-ءتۇنى تىنىمسىز ىزدەگەن پوليتسەيلەرگە العىس ايتتى.
اقپارات Polisia.kz سايتىندا
