يتاليا ۇكىمەتى كارانتيندى جەڭىلدەتۋ جونىندەگى قۇجاتتى بەكىتتى
بۇل تۋرالى قازاقپارات يتاليانىڭ ANSA اگەنتتىگىنە سىلتەمە جاساپ حابارلايدى.
4- مامىر كۇنى ەلدە ونەركاسىپ ءوندىرىسى قايتا جاندانادى. سونىمەن قاتار ساياباقتار، قۇرىلىس الاڭدارى مەن ەكسپورتقا تاۋار شىعاراتىن كاسىپورىندار جۇمىسىن باستايدى. الايدا جۇمىس بەرۋشىلەر جۇمىس ورنىن مۇقيات دەزينفەكتسيالاپ، جۇمىسشىلار ءوزارا قاۋىپسىز ارا قاشىقتىقتى ساقتاۋى كەرەك. سونداي-اق تەك ماسكامەن عانا جانە شاعىن كولەمدە تۋىستاردىڭ ۇيىنە بارۋعا رۇقسات ەتىلەدى.
ۇلكەن وتباسىلىق جيىندارعا بۇرىنعىسىنشا تىيىم سالىنعان. كونتە سونىمەن قاتار 4- مامىردان باستاپ سپورتشىلاردىڭ دا جەكەلەگەن سپورت تۇرلەرى بويىنشا جاتتىعۋعا كىرىسە بەرۋگە بولاتىنىن ايتتى.
دەگەنمەن كوماندالىق سپورت تۇرلەرىنىڭ جاتتىعۋلارىنا 18- مامىرعا دەيىن تىيىم سالىنادى. دۇكەندەر مۋزەيلەرمەن جانە كىتاپحانالارمەن بىرگە جۇمىسىن 18- مامىردان باستايدى.
ايتا كەتەيىك، بۇعان دەيىن تەك ازىق-تۇلىك پەن وزگە دە ءبىرىنشى كەزەكتە قاجەتتى تاۋارلاردى ساۋدالايتىن دۇكەندەر عانا جۇمىس ىستەپ كەلدى.
بارلار، مەيرامحانالار، شاشتاراز بەن سۇلۋلىق سالوندارى ءوز قىزمەتىن 1- ماۋسىمنان باستاي الادى. قوعامدىق تاماقتانۋ ورىندارى 4- مامىردان باستاپ، ونىمدەرىن جەتكىزىپ بەرە الادى. پرەمەر كونتە مەكتەپتەردىڭ بيىلعى وقۋ جىلىنىڭ سوڭىنا دەيىن جابىق بولاتىنىن ايتتى.
يتاليادا قازىر جەرلەۋ ءراسىمىن جاساۋعا رۇقسات ەتىلدى. ايتا كەتەتىن ماسەلە، ۇكىمەت شىركەۋ مەسساسىن ۇيىمداستىرۋدى دۇرىس ەمەس دەپ تاپتى.
ءوز كەزەگىندە بۇل جاعداي يتاليا ەپيسكوپ كونفەرەنتسياسىنىڭ ءدىني ۇستانىم بويىنشا ادام قۇقىعىنىڭ بۇزىلعانى جونىنە شاعىم تۇسىرۋىنە نەگىز بولدى. كونتە سونىمەن قاتار الەۋمەتتىك قاشىقتىقتى ۇستانۋ شاراسىنىڭ ءالى بىرنەشە اي بويىنا جالعاساتىنىن ەسكەرتتى.
ەسكە سالا كەتسەك، يتاليادا كوروناۆيرۋستان قايتىس بولعاندار سانى ەۋروپاداعى ەڭ جوعارى كورسەتكىش بولىپ وتىر. سوڭعى مالىمەتتەر بويىنشا، بۇل ەلدە 26,6 مىڭ ادام كوز جۇمىپ، 197,6 مىڭ ادام اۋىرعان. سوعان قاراماستان ينفەكتسيانىڭ تارالۋ قارقىنى تومەندەپ كەلەدى. سونىمەن قاتار كۇن سايىن قايتىس بولىپ جاتقاندار سانى دا ازايعان.
