پاۆلودار وبلىسىنا شىمكەنتتەن كەلگەن تۇرعىننان كوروناۆيرۋس انىقتالدى

توتەنشە جاعداي رەجيمىن قامتاماسىز ەتۋ جونىندەگى مەملەكەتتىك كوميسسيانىڭ جەدەل شتابىنىڭ مالىمەتتەرىنشە، ۆيرۋستى جۇقتىرعان ادامداردىڭ تورتەۋى پاۆلودار وبلىسىنىڭ تۇرعىندارى.

ولار: 1984، 1979، 1963-جىلدارى تۋعان ايەل ادام جانە 2011-جىلعى ۇل بالا.

تۇرعىلىقتى جەرى بويىنشا بايلانىستا بولۋى مۇمكىن بولعانى ءۇشىن ءۇي كارانتينى رەجيمىن ساقتاپ وتىرعان. COVID-19 ۆيرۋسىن جۇقتىرعانى انىقتالعاننان كەيىن ولار جۇقپالى اۋرۋلار ستاتسيونارىنا جاتقىزىلعان. سونداي-اق، كوروناۆيرۋس ينفەكتسياسى ميچۋرينو اۋىلىنىڭ ماڭىنداعى بلوكپوستتان وتپەكشى بولعان شىمكەنت قالاسىنىڭ تۇرعىنى، 1986-جىلى تۋعان ەر ادامنان انىقتالعان.

ونىڭ قولىندا COVID-19 اۋرۋىن جۇقتىرماعانىن راستايتىن انىقتاما بولماعاندىقتان، ول كارانتيندىك ستاتسيونارعا جەتكىزىلگەن. وسىلايشا، تەكسەرۋ ناتيجەلەرى بويىنشا ونىڭ كوروناۆيرۋستى جۇقتىرعانى انىقتالعان.

ۇلتتىق ساراپتاۋ ورتالىعىنىڭ وبلىستىق بولىمشەسىنىڭ ماماندارى پاتەرلەردە، ۇيلەردىڭ كىرەبەرىستەرىندە، كارانتيندىك گوسپيتالدە، جۇمىس ورىندارىندا زارارسىزداندىرۋ جۇمىستارىن جۇرگىزدى.

«بارلىق جاعداي بويىنشا بايلانىستا بولۋى مۇمكىن ادامدار توبى انىقتالىپ، ولاردى وقشاۋلاۋ جۇمىستارى جۇرگىزىلىپ جاتىر. ەپيدەمياعا قارسى شارالار قولعا الىنعان»، - دەلىنگەن حابارلامادا.

قازىرگى تاڭدا پاۆلودار وبلىسىندا كوروناۆيرۋس ينفەكتسياسىن جۇقتىرعاندار 110 ادام بار.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى