بيلىك كارانتين رەجيمىن كەزەڭ-كەزەڭىمەن بوساڭسىتۋعا نيەتتى - ەرلان كارين
ق ر پرەزيدەنتىنىڭ كەڭەسشىسى ەرلان كارين وسىلاي ءمالىم ەتتى، دەپ حابارلايدى قازاقپارات ءتىلشىسى.
«مەملەكەت باسشىسى كوروناۆيرۋسپەن كۇرەستىڭ جاڭا تاسىلدەرىن جاريا ەتتى. بيلىكتىڭ شۇعىل ءارى تاباندى ءىس-ارەكەتىنىڭ، قاڭتار ايىنان ءتۇرلى ءتۇرلى شارالاردى ەنگىزۋىنىڭ ارقاسىندا ىندەتتىڭ جاپپاي تارالۋىنا جول بەرىلگەن جوق. ەندى ىندەتتىڭ گەومەتريالىق پروگرەسپەن ورشۋىنە جول بەرمەي، بيلىك كارانتين رەجيمىن بىرتىندەپ جانە كەزەڭ-كەزەڭىمەن بوساڭسىتۋعا نيەتتى»، - دەپ جازادى پرەزيدەنت كەڭەسشىسى Telegram پاراقشاسىندا.
ونىڭ اتاپ وتۋىنشە، كوروناۆيرۋستىڭ جاڭادان تارالۋىنا جانە جۇقتىرۋ وشاقتارىنىڭ پايدا بولۋىنا جول بەرمەۋ ءۇشىن توتەنشە جاعداي رەجيمىن بىردەن الىپ تاستاپ، كارانتيندى جەڭىلدەتۋگە بولمايدى.
«سوندىقتان بيلىك ءبىر جاعىنان جەدەل ءارى تاباندى ارەكەت ەتسە، ەكىنشى جاعىنان ەلدەگى جانە وڭىرلەردەگى جالپى جاعدايعا بايلانىستى ءتۇرلى تاسىلدەردى يكەمدى قولدانىپ وتىر. بۇعان قوسا، كارانتيندى ءىشىنارا جەڭىلدەتۋ كوروناۆيرۋستىڭ تارالۋ قاۋپىن باعالاماۋعا الىپ كەلمەۋى ءتيىس. جاڭا ۆيرۋسپەن كۇرەس ءالى دە جالعاسىپ جاتىر»، - دەدى ەرلان كارين.
