مينيستر ۆيرۋس جۇقتىراتىنداي نادىروۆپەن بەتپە- بەت جۇمىس ىستەگەن جوق - باس سانيتار دارىگەر

بۇل تۋرالى قازاقستاننىڭ باس مەملەكەتتىك سانيتار دارىگەرى ايجان ەسماعامبەتوۆا ءمالىم ەتتى، دەپ حابارلايدى قازاقپارات ءتىلشىسى.

«دەنساۋلىق ساقتاۋ مينيسترلىگىنىڭ باسشىلىعى جانە جالپى مينيسترلىكتەگى قىزمەتكەرلەردىڭ 90 پايىزى توتەنشە جاعداي جاريالانعالى بەرى قاشىقتان اتقارىلاتىن جۇمىس تارتىبىنە كوشكەن. كامالجان نادىروۆپەن بايلانىستا بولعان قىزمەتكەرلەردىڭ سانى از. مينيستر ەلجان ءبىرتانوۆ كامالجان نادىروۆپەن جاقىن بايلانىستا بولعان جوق. ايتسە دە، مينيستر دە بۇگىن تەست تاپسىردى. ناتيجەسىن ونىڭ ءوزى جاريالايدى دەگەن ويدامىن»، - دەدى ايجان ەسماعامبەتوۆا و ك ق- دا ونلاين رەجيمدە وتكەن باسپا ءسوز ءماسليحاتىندا.

قازاقستاننىڭ باس مەملەكەتتىك سانيتار دارىگەرى ت ج تالاپتارىنا سايكەس، دەنساۋلىق ساقتاۋ مينيسترلىگىنىڭ شتاتتىق رەجيمدە جۇمىس ىستەپ جاتقانىن حابارلادى. «دەنساۋلىق ساقتاۋ مينيسترلىگىنىڭ عيماراتىنداعى قىزمەتكەرلەر كوروناۆيرۋس ينفەكتسياسى بويىنشا قايتا- قايتا تەستىدەن ءوتىپ ءجۇر. تەستىلەۋ 2 اپتادا ءبىر رەت جۇرگىزىلەدى. الايدا ەشبىرىنەن كوروناۆيرۋس تابىلعان جوق»، - دەدى ول.

ايتا كەتسەك بۇعان دەيىن ايجان ەسماعامبەتوۆا وسى ۋاقىتقا دەيىن قازاقستاندا كوروناۆيرۋس جۇقتىرعاندارمەن بايلانىستا بولعان 40 مىڭعا جۋىق ازاماتتىڭ انىقتالعانىن ءمالىم ەتكەن ەدى. ونىڭ ايتۋىنشا مامىردىڭ سوڭىنا دەيىن ەلىمىزدە كوروناۆيرۋس جۇقتىرعاندار سانى 4 مىڭعا جەتۋى مۇمكىن .

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى