جاڭا كولىكتەردى بۇدان بىلاي ونلاين تىركەۋگە بولادى
اقپارات كوزىنىڭ حابارلاۋىنشا، اۆتوكولىكتەردى ونلاين تىركەۋ قىزمەتى قازاقستاندا وندىرىلگەن كولىكتەر ءۇشىن دە، ەل اۋماعىنا يمپورتتالعاندارى ءۇشىن دە قولجەتىمدى. ونى قولدانۋ ءۇشىن ديلەرلىك ورتالىق egov.kz پورتالىندا كولىك قۇرالىن تىركەۋگە ءوتىنىم بەرۋى ءتيىس.
«ول ءۇشىن پورتالدا اۆتورلاندىرۋدان ءوتىپ، «كولىك جانە كوممۋنيكاتسيالار» بولىمىنەن «قازاقستان رەسپۋبليكاسى اۋماعىنداعى رەسمي ديلەرلەردەن ساتىپ الىنعان كولىك قۇرالدارىن باستاپقى تىركەۋ» دەگەن ايدارعا ءوتىپ، «ونلاين سۇراۋ» باتىرماسىن باسۋ قاجەت. ارتىنشا «شاناق ءنومىرىن» ەنگىزەسىز. «شاناق ءنومىرى» ءساتتى تەكسەرىلگەن سوڭ وتىنىمدەگى بارلىق مىندەتتى جولداردى تولتىرۋ كەرەك.
وسىدان كەيىن قاجەتتى قۇجاتتاردى تىركەيسىز دە، سۇرانىمدا كولىكتى ساتىپ الۋشىنىڭ ج س ن- ىن ەنگىزۋ قاجەت. ە س ق (ەلەكتروندى سيفرلىق قولتاڭبا) ارقىلى قول قوياسىز. سودان سوڭ ساتىپ الۋشىعا راستاۋعا جىبەرۋ كەرەك»، - دەلىنگەن حابارلامادا.
ءارى قاراي ساتىپ الۋشى «قىزمەتتەردى الۋ تاريحى» بولىمىنە ءوتىپ، جەكە كابينەتىندەگى راسىمدەلگەن سۇرانىممەن تانىسۋى ءتيىس. ارتىنشا كولىگىنە ءنومىر تاڭداپ، مەملەكەتتىك باج سالىعى مەن تىركەۋ جارناسىن تولەيدى دە، ە س ق ارقىلى سۇرانىمدى راستايدى. ساتىپ الۋشى دايىن قۇجاتتاردى ءوزى تۇراتىن وڭىردەگى مامانداندىرىلعان ح ق ك و-نان الىپ كەتە الادى.
اۆتور: ايان بەكەن ۇلى
