الەۋمەتتىك جەلىدە پوليتسيا قىزمەتكەرلەرىن بالاعاتتاعان ادام جاۋاپقا تارتىلدى
الەۋمەتتىك جەلىلەرگە جۇرگىزىلگەن مونيتورينگ بارىسىندا ەر ادامنىڭ پوليتسيا قىزمەتكەرلەرىن قورلاۋ فاكتىسى انىقتالدى.
«ول ءوزىنىڭ ينستاگرام پاراقشاسىندا پوليتسيا قىزمەتكەرلەرىنە ارنالعان بىلاپىت سوزدەرى بار مونولوگىن جاريالاعان. بىرنەشە رەت كامەراعا جاعىمسىز ءسوز ايتقان. بۇل جىگىت ق ر قىلمىستىق كودەكسىنىڭ 378-بابىمەن بيلىك وكىلىن قورلاعانى ءۇشىن جازالانادى. بۇل فاكت سوتقا دەيىنگى تەرگەۋدىڭ ءبىرىڭعاي رەەسترىنە تىركەلگەن. قىلمىستىق ءىستى پ د تەرگەۋ باسقارماسى جۇرگىزەدى. بۇگىن ول قاماۋعا الىنىپ، قىلمىستىق جاۋاپكەرشىلىككە تارتىلدى»، - دەدى الماتى قالالىق پوليتسيا دەپارتامەنتى باسشىسىنىڭ ورىنباسارى رۋستام ابدراحمانوۆ.
ەر ادام ءوز ارەكەتى ءۇشىن جۇرتتان كەشىرىم سۇرادى.
«مەن قازاقستان رەسپۋبليكاسىنىڭ بارلىق ازاماتتارىنان جانە پوليتسيا قىزمەتكەرلەرىنەن كەشىرىم سۇرايمىن. سىزدەردەن مەنى ءتۇسىنىپ، كەشىرگەندەرىڭىزدى قالايمىن. مەن ق ر زاڭناماسىندا كورسەتىلگەندەي زاڭ الدىندا تولىق جاۋاپ بەرۋگە دايىنمىن. كەشىرىڭىز، وتىنەمىن»، - دەدى ول.
اۆتور: گۇلميرا عوسمانالي
