جاستارعا دەگەن سەنىم وتە زور - نۇرلان نىعماتۋلين
بۇل تۋرالى ءتيىستى كونستيتۋتسيالىق زاڭ جوباسىن تالقىلاۋ كەزىندە ءماجىلىس ءتوراعاسى نۇرلان نىعماتۋلين ءمالىم ەتتى، دەپ حابارلايدى قازاقپارات ءتىلشىسى.
«بۇل سۇراق جالپى قوعامدا جانە جۇمىس توبىندا كوپ تالقىلاندى. بىرىنشىدەن، كوپتەگەن ەلدەردە سايلاۋ پارتيالىق تىزىمدە جاستارعا ارنالعان كۆوتا مىندەتتى تۇردە بەكىتىلگەن. ەكىنشىدەن، قاي كەزدە قانداي قوعامدا بولسا دا، جاستارعا دەگەن سەنىم وتە زور. ارينە، جاستاردىڭ ومىرلىك تاجىريبەسى ازداۋ بولۋى مۇمكىن، ءبىراق تا ولاردىڭ زامانعا ساي يدەيالارى، ۇسىنىستارى وتە كوپ. قازاق حالقى وسىندايدا «اسىل تاستان، اقىل جاستان» دەيدى. مەنىڭ ويىمشا، جاستار كۆوتاسى پارتيالىق تىزىمدە مىندەتتى تۇردە زاڭ بويىنشا بولۋى كەرەك»، - دەدى نۇرلان نىعماتۋلين پارلامەنت ءماجىلىسىنىڭ جالپى وتىرىسىندا.
وسى ورايدا ول تىڭ ۇسىنىستار قابىلداۋ ءۇشىن جاستاردى بەلسەندى تارتۋ كەرەكتىگىن اتاپ ءوتتى. بۇدان بۇرىن حابارلانعانداي، ءماجىلىستىڭ جالپى وتىرىسىندا قازاقستان رەسپۋبليكاسىنداعى سايلاۋ تۋرالى «قازاقستان رەسپۋبليكاسىنىڭ كونستيتۋتسيالىق زاڭىنا تولىقتىرۋلار ەنگىزۋ تۋرالى» كونستيتۋتسيالىق زاڭىنىڭ جوباسى ماقۇلداندى.
«زاڭ جوباسىمەن پارتيالىق سايلاۋ تىزىمدەرىندە ايەلدەر مەن جاستار ءۇشىن 30 پايىز كۆوتانى قاراستىرۋ ۇسىنىلادى. وسى ماقساتتا، سايلاۋ تۋرالى كونستيتۋتسيالىق زاڭدا ايەلدەر مەن جاستارعا ارنالعان كۆوتالاردى پارتيالىق تىزىمگە ەنگىزۋ تۋرالى تالاپ قويىلاتىن بولادى»، - دەدى ادىلەت ءمينيسترى مارات بەكەتايەۆ.
اۆتور: رۋسلان عابباسوۆ
