نۇر-سۇلتاندا ءىرى قۇرىلىس دۇكەندەرى جۇمىسىن باستادى
نۇر-سۇلتان تۇرعىندارى توتەنشە جاعدايداعى كارانتين رەجيمىندە قۇرىلىس-ارلەۋ ماتەريالدارى گيپەرماركەتتەرىنىڭ بىرىندە تاۋار الۋ ءۇشىن كەزەكتە تۇر، دەپ حابارلايدى قازاقپارات ءتىلشىسى.
«گيپەرماركەتتىڭ جۇمىس رەجيمى تاڭعى 9:00 دەن كەشكى 18:00 گە دەيىن. شتاتتىڭ %50 ى قالادان تىس جەردە تۇراتىندىقتان، %30 ىن عانا جۇمىسقا شىعاردىق. قالعاندارى دا جۇمىسقا شىققىسى كەلەدى. سانيتارلىق- ەپيدەميولوگيالىق تالاپتاردىڭ الگوريتمى بويىنشا ساتىپ الۋشىلار ءۇشىن ەكى مەتر قاشىقتىقتى ۇستاپ ءجۇرۋ ءۇشىن بەلگىلەر قويدىق. ەسىك اۋزىندا باقىلاۋشى كەلگەن ادامداردىڭ قولىنا سانيتايزەر بۇركىپ تۇرادى. دەنە قىزۋىن ولشەپ تۇراتىن باقىلاۋشى دا بار. دەنە قىزۋى كوتەرىلىپ تۇرعان ساتىپ الۋشى بولعان جوق، ءبىراق مەديتسينالىق ماسكا تاقپاي كەلگەندەر بولدى. ءبىز ولاردى ساۋدا جاسايتىن جەرگە جىبەرمەي، الدىمەن ماسكا تاعىپ كەلۋىن وتىندىك»، - دەيدى «مەگاستروي» گيپەرماركەتى ديرەكتورىنىڭ ورىنباسارى وكسانا سۋحورۋكوۆا.
ول قۇرىلىس ماتەريالدارىنا سۇرانىس كوپ ەكەنىن ايتتى.
«بىزدە از ادام جۇمىس ىستەپ جاتقاندىقتان، وسىنشاما تۇتىنۋشى كەلەدى دەپ ويلامادىق. بۇگىن قوسىمشا قىزمەتشىلەر الدىق. قۇرىلىس ماتەريالدارىن سالاتىن اربا ءار قولدانىستان كەيىن دەزينفەكتسيالانادى. ساۋدا جاسايتىن ورىندا ساتىپ الۋشىلار ارا قاشىقتىق ساقتاۋى كەرەك ەكەندىگى داۋىس زورايتقىشپەن ايتىلادى. گيپەرماركەتكە بەس ادامنان كىرگىزەمىز، كاسساعا ۇنەمى قاراپ وتىرامىز»، - دەيدى ول.
سونداي-اق، ول گيپەرماركەت جۇمىسشىلارى 42500 تەڭگە الەۋمەتتىك تولەم العان-الماعانى تۋرالى ايتتى.
«پەرسونالدارمەن جۇمىس ءبولىمىنىڭ باسشىسى جۇمىسپەن قامتۋ ورتالىعىنا 500 تەڭگە كولەمىندە الەۋمەتتىك تولەم الۋعا ءوتىنىش بەردى. ءبىزدىڭ قىزمەتشىلەردىڭ %80 ى اتالعان جاردەماقىنى الدى. كەي قىزمەتشىلەرگە ءارتۇرلى سەبەپپەن تولەم بەرىلمەيتىنى تۋرالى حابارلاما كەلدى، قالعانى ءالى دە كۇتۋدە. جالپى العاندا قىزمەتشىلەردى ۇيىنە ءوزىمىز تاسىمالدايمىز، تاماعى بار. ءبىز دەنە قىزۋى نەمەسە جرۆي بەلگىلەرى بار-جوعىن تەكسەرەتىن مەديتسينالىق قىزمەتشىنى جۇمىسقا الدىق»، - دەيدى ديرەكتوردىڭ ورىنباسارى.
سونىمەن قاتار، تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ ءبولىمى ەرەجەلەردى ساقتاۋعا شاقىرىپ، كارانتين كەزىندەگى قۇرىلىس دۇكەندەرىنىڭ جۇمىس الگوريتمى تۋرالى ايتتى.
«20- ساۋىردەن باستاپ ءىرى قۇرىلىس دۇكەندەرىنىڭ جۇمىسى قايتا جانداندى. ولاردىڭ قىزمەتىنە سانيتارلىق- ەپيدەميولوگيالىق تالاپتارعا سايكەس بەلگىلى ءبىر جاعدايلاردا رۇقسات ەتىلگەن. جالپى اۋدانى 2 مىڭ شارشى مەتردەن اساتىن قۇرىلىس دۇكەندەرىنىڭ جۇمىس كەستەسى ساعات 9: 00-دەن 18:00-گە دەيىن جالعاسادى»، - دەيدى نۇر- سۇلتان قالاسى تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ ءبولىمىنىڭ باستىعى اينۇر داۋلەتبايەۆا.
ول كەڭەس بەرۋشى مەن ساتىپ الۋشىنىڭ اراقاشىقتىعى 2 مەتر بولۋى قانشالىقتى ماڭىزدى ەكەنىن ايتىپ ءوتتى جانە حالىقتى كارتا ارقىلى تولەم جاساۋعا شاقىردى.
«عيمارات ىشىندە دەزينفەكتسيا جۇرگىزىلىپ تۇرۋى كەرەك. قىزمەتشىلەردىڭ تاماقتانۋىن دۇرىس ۇيىمداستىرۋ كەرەك. تاماقتاندىرۋدى ۇيىمداستىرۋ كەستە بويىنشا جۇزەگە اسۋى كەرەك، قىزمەتشىلەر ءبىر جەردە جينالىپ قالماي، وزدەرىن 2 مەتر قاشىقتىقتا ۇستاۋى كەرەك»، - دەيدى ول.
