ەلجان ءبىرتانوۆ: جۇمىس ىستەۋگە مۇرسات بەرىڭىزدەر

«سوڭعى دەرەكتەر بويىنشا ەلىمىزدە كوروناۆيرۋس ينفەكسياسىن جۇقتىرعان 579 مەديتسينالىق قىزمەتكەر بار. جالپى كارانتين كەزەڭىندە ءدال وسى دارىگەرلەردىڭ ۆيرۋستى جۇقتىرۋ قاۋپى جوعارى»، - دەدى ەلجان ءبىرتانوۆ تەنگرينيۋس Instagram پاراقشاسىنىڭ تىكەلەي ەفيرىندە.

ءمينيستردىڭ ايتۋىنشا، قازىرگى تاڭدا ەلىمىزدە كوروناۆيرۋس جۇقتىرعان ازاماتتاردىڭ 80 پايىزى اۋرۋدى بەلگىسى جوق كۇيدە كوتەرەدى.

«ەلدە كوروناۆيرۋس جۇقتىرعاندار سانى از بولعان كەزدە ءبارىن تەستتەن وتكىزۋدىڭ قاجەتتىگى تۋىندامادى. الايدا ماسەلەن اۋرۋحاناعا قولىن سىندىرىپ ءتۇسىپ جاتقانداردىڭ وزىنەن كوروناۆيرۋس انىقتالىپ جاتتى. ولاردى ءبىرىنشى قابىلداپ، ەمدەيتىن دارىگەرلەر. ولار وسىلايشا دارىگەرلەرگە ۆيرۋس جۇقتىرۋى مۇمكىن. سول سەبەپتى مەديتسينا قىزمەتكەرلەرىنىڭ اۋرۋدى جۇقتىرىپ الۋى بارىمىزگە وڭاي ءتيىپ تۇرعان جوق. ناۋقاستارمەن تىكەلەي جۇمىس جۇرگىزىپ جاتقاندار دا سولار. ەكىنشىدەن كەي جاعدايدا سانيتارلىق تالاپتاردىڭ ساقتالماۋى دا سەبەپ بولاتىنى بار»، - دەدى ول.

ەلجان ءبىرتانوۆ دارىگەرلەردىڭ كوروناۆيرۋستى جۇقتىرۋىنىڭ ءاربىر وقيعاسى بويىنشا ەپيدەميولوگيالىق تەرگەۋ جۇرگىزىلەتىنىن ەسكە سالدى.

«مەديتسينا قىزمەتكەرلەرىنىڭ ناۋقاستانىپ جاتقانىن كورىپ وتىرمىز. الايدا بۇل ماسەلەنىڭ ماڭىندا قولدان جاسالعان دۇربەلەڭدى تۋعىزباي- اق قويالىق. بۇرىس باعا بەرۋدىڭ قاجەتى جوق. زاڭدى تۇردە ماسەلەنىڭ انىق- قانىعىنا جەتۋگە مۇرسات بەرىڭىزدەر. ءبىزدىڭ عانا تەكسەرۋىمىز ەمەس، پروكۋراتۋرا سەكىلدى باقىلاۋ ورگانى دا بۇل ماسەلەمەن ءجىتى اينالىسادى. ەڭ باستىسى - اۋرۋدىڭ جەڭۋگە ماڭىز بەرىپ، ەپيدەمياعا قارسى جۇمىس جۇرگىزۋگە مۇمكىندىك بەرىڭىزدەر»، - دەيدى ەلجان ءبىرتانوۆ.

اۆتور: ايان بەكەن ۇلى

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى