قازاقستاندا كوروناۆيرۋس ىندەتى قاشان باسەڭدەۋى مۇمكىن
«كەز كەلگەن ينفەكسيانىڭ شارىقتاۋ شەگى بارىن ايتىپ كەلەمىز. دەنساۋلىق ساقتاۋ مينيسترلىگىنىڭ، ۇكىمەتتىڭ دۇرىس ارەكەتىنە قاراي ول باسەڭدەيدى. جالپى كوپ ەلدە اۋرۋدىڭ تارالىپ، باسەڭدەۋ ۋاقىتى ءۇش ايدى الىپ وتىر. الايدا الەمدەگى ءبىر دە ءبىر ەل ءالى دە نولدىك دەڭگەيگە جەتكەن جوق. ق ح ر- دا جاڭادان جۇقتىرعانداردىڭ مۇلدە تىركەلمەگەن وقيعاسى بولعان. الايدا ينفەكسيا قازىر الەمنەن ەشقايدا ۇشىپ كەتكەن جوق. اينالىپ ءجۇر. ازىرگە جوعالار ءتۇرى بايقالمايدى»، - دەدى ەلجان ءبىرتانوۆ تەنگرينيۋس Instagram پاراقشاسىنىڭ تىكەلەي ەفيرىندە.
وسى سەبەپتى مينيستر كوروناۆيرۋس باسەڭدەگەن كۇننىڭ وزىندە بەلگىلى ءبىر ۋاقىت ىشىندە اۋرۋدى جۇقتىرۋ جاعدايى بولاتىنىن ايتادى.
«سوندىقتان اۋرۋدىڭ ءوسىمىن، شارىقتاۋ شەگى مەن باسەڭدەۋ ۋاقىتىن ءۇش اي بويى باقىلاۋدا ۇستايمىز. الايدا مامىردان كەيىن ءبارى ورنىنا كەلە قالادى دەپ تاعى ايتا المايمىز. البەتتە ينفەكسيانىڭ بەلگىلى ءبىر مولشەردە تىركەلەتىنى تۋرالى بولجام بار. ءبىزدىڭ مىندەت - وسى جاعدايدا ءومىر سۇرۋگە ۇيرەنۋ. سەبەبى ينفەكسيا جۇقپالى. حالىقتىڭ جەكەلەگەن ساناتى ءۇشىن ول ايقىن قاۋىپ تۋعىزۋى مۇمكىن»، - دەدى ول.
اۆتور: ايان بەكەن ۇلى
