مينيستر الەۋمەتتىك تولەم ەرەجەسىنىڭ بىرنەشە رەت وزگەرۋ سەبەبىن ءتۇسىندىردى
«كوپتەگەن كىسىلەر سىناۋ بارىسىندا «وسى مينيسترلىك ەرەجەنى ىلعي وزگەرتە بەرەدى، حالىقتى جاڭىلىستىرادى. بىرەسە الادى، بىرەسە المايتىن بولىپ شىعادى» دەيدى.
ول دۇرىس ەمەس. سىزدەرگە ءتۇسىندىرىپ بەرەيىن. 23-ناۋرىز كۇنى پرەزيدەنتىمىز جاڭا تولەم ەنگىزىلەتىندىگىن حابارلاعاننان كەيىن ءۇش كۇننىڭ ىشىندە ءبىز ەلىمىزدە جاڭا، بۇرىن بولماعان الەۋمەتتىك تولەمەن ەنگى ز دىك. ءوتىنىش بەرۋ، تاعايىنداۋ جولدارىن رەتتەدىك. ودان كەيىن سۇراقتار تۋىنداپ جاتتى، حالىقتىڭ وتىنىشتەرى، تالاپتارى، ارىزدارى ءتۇستى. سوندىقتان ءبىز حالىقتىڭ وتىنىشتەرىن ەسكەرىپ، تولەمدى جەڭىلدەتۋ ءۇشىن عانا وزگەرىستەر ەنگىزدىك» ، - دەدى مينيستر. مىسالى، ونىڭ تۇسىندىرۋىنشە، بۇرىن 42500 تەڭگە الەۋمەتتىك تولەمدى تەك جەكە كاسىپكەرلىكتەر عانا الا الاتىن. ال 29-ناۋرىزدا ەنگىزىلگەن وزگەرىستەرگە سايكەس، بۇل قاتارعا ازاماتتىق- قۇقىقتىق سيپاتتا جۇمىس ىستەپ جۇرگەن فريلانسەرلەر، كارانتيندەگى قالالاردىڭ ءىرى كاسىپورىنداردىڭ اقىسىز دەمالىسقا جىبەرىلگەن جۇمىسشىلارى قوسىلدى. سوڭعى 12 ايداعى الەۋمەتتىك تولەمدەر 3 رەتتەن 1 رەتكە قىسقارتىلدى.
«كەلەسى وزگەرىس 3-ساۋىردە بولدى. كوممەرتسيالىق ەمەس ۇيىمدار تاراپى دا قارجىلىق مۇمكىندىكتەرىنىڭ جوقتىعىنا بايلانىستى قىزمەتكەرلەرىن اقىسىز دەمالىسقا جىبەرگەندىكتەرىن ايتتى. سوندىقتان وسى ۇيىمداردى قوستىق. 31-ناۋرىزدا پرەزيدەنتىمىز «رەسمي جۇمىس ىستەگەندەرمەن قاتار بەيرەسمي جۇمىس ىستەگەن ازاماتتار ءبىر رەت ءبىرىڭعاي جيىنتىق تولەم تولەپ، مارتەبەسىن انىقتاپ، الەۋمەتتىك تولەم السىن» دەپ تاپسىرما بەردى. 3-ساۋىردە سونى ەنگىزدىك»، - دەدى ءبىرجان نۇرىمبەتوۆ. مينيستر 15-ساۋىردەگى سوڭعى وزگەرىستەرگە دە توقتالدى.
«كوپتەگەن ادامنىڭ بانكتەردە ەسەپشوتتارى جوق ەكەن. ءسويتىپ، ادامدار بانككە اعىلدى. سوندىقتان ءبىز جەدەل تۇردە شەشىم قابىلداپ، ءوتىنىشتى ەسەپشوتتاردى كورسەتپەي بەرۋ مۇمكىندىگىن جاسادىق. تولەمدى تاعايىنداپ قويامىز، 30 كۇنگە دەيىن ەسەپشوت اشقاندارىڭىزدى كۇتەمىز. ال مۇنى ەرەجەگە اشىپ جازۋىمىز كەرەك. سەبەبى تاعايىندايتىن مەكەمەگە ەسەپشوتسىز تاعايىنداۋ قۇقىعىن بەرۋىمىز قاجەت. بۇعان قوسا، ءبىراز ازاماتتىڭ جەكە كۋالىگىنىڭ مەرزىمى ءوتىپ كەتكەن ەكەن. 42500 تەڭگە تولەۋگە كەدەرگى بولماسىن دەپ ونىڭ دا شەشىمىن قابىلدادىق. وزگەرىستەردى ەرەجەگە قوستىق»، - دەدى ول.
