كارانتيندە قالاي كۇيزەلىسكە ۇشىراماۋعا بولادى - پسيحولوگ كەڭەسى
وسىنداي جاعدايدا قالايشا جاقسى قارىم-قاتىناستى ساقتاپ قالۋعا بولادى؟ ءوزىڭدى قالاي ۇستاۋ كەرەك؟ نە ءبىلۋ كەرەك؟ بۇل سۇراقتارعا پسيحولوگ ولگا شيحوۆا قازاقپارات تىلشىسىنە ايتىپ بەردى.
ولگا شيحوۆا جاڭا ومىرگە بەيىمدەلۋدىڭ ادىستەمەسىن كورسەتەتىن «اقىلدى ايەل» كىتابىنىڭ اۆتورى.
پسيحولوگتىڭ ايتۋىنشا، قازىر ادامداردىڭ بارلىعى ادەتتەگى ءومىر ءسۇرۋ ءريتمى بۇزىلعان سوڭ كۇيزەلىسكە تۇسكەن.
ءدامحانالار، بالالار دەمالاتىن جەرلەر جابىق. سوندىقتان وتباسىلاردا كوڭىل قالۋ، وكپە رەنىش، كوڭىل تولماۋشىلىق بولاتىنى قالىپتى جاعداي. الايدا ادامدار نەگاتيۆتى ويلارمەن كۇرەسۋى كەرەك.
جاعىمسىز اقپاراتتى ىشىندە جيناماۋى كەرەك. سەبەبى ادام ەموتسياسىن ىشىنە جيناعان سايىن ارتى ءىرى داۋ-جانجالعا اكەپ سوعۋى ىقتيمال. پسيحولوگتىڭ ايتۋىنشا، جاعىمسىز ەموتسيامەن كۇرەسۋگە ءبىزدىڭ حالىققا جەڭىمپاز گەنى كومەكتەسەدى.
«ءبىزدىڭ اتا-بابامىز كوپ سوعىستى، اشتىقتى، رەپرەسسيانى باسىنان كەشىرگەن. بارلىق سىناقتان حالقىمىز جەڭىپ شىقتى. ءبىز سونداي حالىقتىڭ ۇرپاعىمىز. سول ءۇشىن ءبىز بۇل جولى دا باتىرلىق تانىتۋىمىز كەرەك. بارلىعىمىز سانيتارلىق تالاپتاردى ساقتاي وتىرىپ، بىرگە كۇرەسەمىز. كارانتيننىڭ تەك جامان جاعىن كورمەيىك، جاقسى جاعى دا جەتەرلىك»، - دەدى ولگا شيحوۆا.
ونىڭ ايتۋىنشا، قازىرگى سانانى تۇرمىس بيلەگەن زاماندا بالالارعا اتا-انالارىنىڭ سويلەسۋى، قارىم-قاتىناسى جەتىسپەيدى.
«كارانتين كەزىندە وسى ولقىلىقتىڭ ورنىن تولتىرۋعا مۇمكىندىك تۋىپ وتىر. بالالارمەن اشىق سويلەسىپ، بىرگە ارمانداپ، بىرگە بولاشاققا جوسپار قۇرۋ كەرەك. بىرگە فيلم كورىپ، ويىن ويناعان دۇرىس. ءدامدى تاماق جەۋ دە ادامنىڭ كوڭىلىن تولتىرادى. بارلىق ادام بالمۇزداق جاقسى كورەدى. كوتەرىڭكى كوڭىل كۇي، جاقسى ەموتسيا ادامنىڭ يممۋنيتەتىن كوتەرەتىنى انىق»، - دەدى ول.
