دارىگەرلەردىڭ جەكە كولىگىنە ارنايى بەلگى جابىستىرىلادى
«قازىرگى تاڭدا مەديتسينا قىزمەتكەرلەرى كوروناۆيرۋس ينفەكتسياسىمەن كۇرەستە الدىڭعى شەپتە ءجۇر. ادامداردىڭ دەنساۋلىعى دارىگەرلەردىڭ شاقىرىلعان جەرگە تەز كەلۋىنە بايلانىستى. وسىعان وراي نۇر-سۇلتان قالاسىنىڭ پوليتسيا دەپارتامەنتى قالا كوشەلەرىندە ولاردىڭ قوزعالىسىن جەڭىلدەتۋ ءۇشىن قىزىل كرەست تۇرىندەگى «دارىگەر» بەلگىسىن تاراتادى»، - دەپ ءمالىم ەتتى قالالىق پوليتسيا دەپارتامەنتىنەن.
جۇرگىزۋشىلەردى تەكسەرۋ ءۇشىن قالانىڭ بىرنەشە نۇكتەسىندە موبيلدى پوستتاردىڭ قويىلعانى بەلگىلى. وسىدان كەي جەردە كولىكتەر كوپ تۇرىپ قالادى.
«وسىنداي جاعدايدا دارىگەرلەر ءوز كولىگىمەن كەدەرگىسىز ءوتۋى ءۇشىن پوليتسيا قىزمەتكەرلەرى وسى بەلگىنى تاراتادى. ق ر جول ءجۇرۋ ەرەجەسىندە «تانۋ بەلگىلەرى» دەگەن نورما بار. وعان سايكەس جەدەل ءارى ارنايى قىزمەتتەردىڭ اۆتوكولىكتەرى، اۆتوبۋستارى مەن موتوتسيكلدارىنىڭ س ت ر ك 1863-2018 ۇلتتىق ستاندارتىنا سايكەس بەلگىلى ءبىر فۋنكتسيالىق مىندەتتە ەكەنى ايقىندالادى.
ق ر ج ج ە «تانۋ بەلگىلەرى» ءبولىمى تالاپتارىنا سايكەس دارىگەر- جۇرگىزۋشىنىڭ تىلەگى بويىنشا ونىڭ كولىگىنىڭ ارتىنا نەمەسە الدىنا كوك تۇسپەن قورشالعان اق فونداعى قىزىل كرەست بەلگىسى جابىستىرىلادى»، - دەلىنگەن حابارلامادا.
