تاڭعى شىقتىڭ تاعدىرى تولعاندىرعان اقىندار
مۇندا اقىن تاڭ مەن ءتۇننىڭ اراسىنداعى قاس- قاعىم ساتتەگى شىقتىڭ جوعالۋ ءساتىن، ءوز سوزىمەن ايتقاندا «ءتۇنى بويى كوز ىلمەگەن مولدىرلىكتىڭ، اق پەن قىزىل اراسىنداعى» ءولىمىن جانە ونىڭ نۇرلار تابانىندا تاپتالعان بەيكۇانا مۇردەسىن جۇرەكتىڭ تۇبىنە جەتكىزە، ەلجىرەتە جازادى.
«مەن تۇرمىن ۇستاپ بەيباق جۇرەگىمدى،
شانشيدى،
اۋىرادى ول.
ناناسىڭ با؟ « - دەيدى. شىنىمەن دە قولقا- جۇرەگىڭ ءبىر شىم ەتە تۇسەدى.
ال جاقىندا نەسىپبەك ايت ۇلىنىڭ دا «تاڭعى شىقتىڭ تاعدىرى» دەگەن اتپەن ءبىر توپ توپتاما ولەڭى وقىرمان نازارىندا ءجۇردى. ول كىسىنىڭ شىق تۋرالى تولعانىسى ءۇش- اق شۋماقتان تۇراتىن قىسقا عانا ولەڭ. مولدىرەپ ولگەن سۇلۋلىقتى، ءوزىنىڭ كادۋەلگى ادەتىمەن مولدىرەتە جىرلاي سالىپتى.
«كىمدى ءبىراق تولعاندىرار،
تاڭعى شىقتىڭ تاعدىرى؟ .. « دەپ ولەڭ سوڭىندا وقىرمانعا وي قالدىرىپ تا ۇلگەرگەن اقىن.
ەندىگى ايتقالى وتىرعان ءۇشىنشى ءبىر ولەڭدى وسىدان بىرنەشە جىل بۇرىن وقىعام. تاماشا اسەر العام. تۇردىحان ايدارحان ۇلىنىڭ ولەڭى. ونىڭ دا تاقىرىبى «تاڭعى شىقتىڭ تاعدىرى» .
«سەنىڭ تيتتەي شاراڭا سيادى اسپان،
بارقىت ءتۇننىڭ سەزىنسە سوگىلگەنىن»، - دەيدى اقىن. جانارىنا شەكسىز الەم سيعان ءبىر ءتۇيىر تازالىقتىڭ ءولىمى. الدىڭعى ولەڭدى وقىعان سوڭ ەسىمە ءتۇسىپ قايتا قاراپ شىقتىم. ەسەنعالي كوكەمىزدىڭ ولەڭىندەگى وي جەلىسىن بۇدان دا اڭعارعانداي بولدىم. سوڭىندا، ارعى- بەرگى بەتتەگى ءسوز مارجانىن تەرگەن قازاق جۇرتىنا مەكتەبى الدەقاشان قالىپتاسىپ ۇلگەرگەن اقىننىڭ وي لەبى تۇردىحاننىڭ جىرىنان ءۇپ ەتسە نەسى ايىپ دەگەن ويعا كەلدىم.
تاڭعى شىقتى جانى ءمولدىر قاي اقىن جىرىنا قوسپادى، بارلىق اقىننان تاۋىپ الۋعا بولاتىن دۇنيە. دەسەدە، سولاردىڭ اراسىنان ءبىر - بىرىمەن تامىرلاسىپ جاتقان ءۇش ولەڭدى توپتاستىرىپ، ەل نازارىنا ۇسىنۋدى ءجون كوردىم.
رەتبەك ماعاز
شىقتىڭ ءولۋى
ەسەنعالي راۋشانوۆ
ماۋسىمنىڭ ون ءۇشىنشى جاڭاسىندا،
وزەن جاعاسىندا،
شالعىن اراسىندا،
ءمولدىر شىق…
كىرپىك ىلمەي تۇنىمەنەن،
كوز جۇمدى تاڭعا جاقىن
ناناسىڭ با؟
نۇرلار اپپاق،
ءتۇندى اداقتاپ،
جامىراپ بارا جاتى،
ولگەن شىقتى
اسىعىس اتتاپ ءوتىپ،
قىرعا قاپتاپ.
قىرعا قاپتاپ،
ەي، نۇرلار، باراسىڭدار مۇردەنى اتتاپ.
لاپ قويعان اق تاسقىندى بوگەي الماي،
دارمەنسىز قاراي بەرەم كۇنگە الاقتاپ.
ماۋسىمنىڭ ون ءۇشىنشى جاڭاسىندا،
وزەن جاعاسىندا،
شىق ءولدى.
اق پەن قىزىل اراسىندا.
مەن تۇرمىن ۇستاپ بەيباق جۇرەگىمدى،
شانشيدى،
اۋىرادى ول.
ناناسىڭ با؟
تاڭعى شىقتىڭ تاعدىرى
نەسىپبەك ايت ۇلى
جارىق دۇنيە جالعاسىنداي،
اي نۇرىنان تامدى ءسۇت.
قارا ءتۇننىڭ كوز جاسىنداي،
مولدىرەگەن تاڭعى شىق.
سەزەتىندەي كوپ تۇرماسىن،
دىرىلدەيدى ءتىزىلىپ.
جەل تەربەسە ءشوپتىڭ باسىن،
جەرگە تۇسەر ءۇزىلىپ.
بار تىرشىلىك ءشول قاندىرار،
توگىلگەندە تاڭ نۇرى.
كىمدى ءبىراق تولعاندىرار،
تاڭعى شىقتىڭ تاعدىرى؟ ..
تاڭعى شىقتىڭ تاعدىر
تۇردىحان ايدارحان ۇلى
تاڭ مەن ءتۇننىڭ جارالعان اراسىندا،
تاڭعى شىقتاي عۇمىرىم ناناسىڭ با؟
تامشى تىرلىك گۇلدەردىڭ تاڭدايىندا،
مولدىرەيسىڭ بۇلاقتىڭ جاعاسىندا.
مولتىلدەگەن ءمولدىرىم توگىلمەگىن،
توگىلگەنىڭ ۇزگەنىڭ ءومىر دەمىن.
سەنىڭ تيتتەي شاراڭا سيادى اسپان،
بارقىت ءتۇننىڭ سەزىنسە سوگىلگەنىن.
سەنىڭ تيتتەي شاراڭا سيادى اسپان،
كىناڭ بولسا پاش قىلار قيا باسقان.
جۇدىرىقتاي، جول سىلتەر جۇرەگىڭە،
جۇمىر جەردىڭ بەتىندە ءجيى اداسقان.
تىنىشتىقتىڭ تىڭداتىپ شىرىن ءانىن،
تىپتەن بىزگە ۇنايدى تۇنىعانىڭ.
تاعدىرىڭنان تاڭعى شىق الاڭدايمىن،
قىزىل جەلى سوققاندا قۇبىلانىڭ.
