جەتىسايلىق اجەلەر ماسكا تىگىپ، تۇرعىندارعا تەگىن تاراتىپ جاتىر
زەينەت جاسىنداعى انالار جۇمىسپەن قامتۋ جانە الەۋمەتتىك باعدارلامالار بولىمىنە وزدەرى تىككەن ماسكالاردى تابىس ەتتى، دەپ حابارلايدى قازاقپارات ءتىلشىسى.
جەتىساي جەرىندە بەتپەردە تاپشىلىعى بولماسا دا كوپبالالى جانە از قامتاماسىز ەتىلگەن وتباسىلار مەن مۇمكىندىگى شەكتەۋلى جاندارعا دەمەۋشىلەر تاراپىنان گيگيەنالىق جانە جەكە باس تازالىعىن ساقتاۋ قۇرالدارى تەگىن تاراتىلۋدا.
«ءبىزدىڭ بۇل ارەكەتىمىزدى وزگە جاس انالار مەن ارۋ قىزدارىمىز قولداۋى كەرەك. كەستە تىگە الاتىن قىزى بار ءۇيدىڭ ادامدارى بەتپەردە جوق دەپ ايتۋى ۇيات. ەلگە كەلگەن ناۋبەتتى ەل بولىپ جۇمىلا كوتەرۋىمىز ءتيىس» ، - دەيدى اۋداندىق اجەلەر القاسىنىڭ ءتورايىمى ايجامال قوڭىربايەۆا.
اجەلەردىڭ قولىنان شىققان 700 بەتپەردە اۋدانداعى وسال توپتاعى ازاماتتارعا تەگىن ۇلەستىرىلەتىن بولادى.
«ەل باسىنا كۇن تۋعاندا قول قۋسىرىپ وتىرماي، دەمەۋ كورسەتە بىلگەنى ءۇشىن اۋدانىمىزدىڭ اقجاۋلىقتى اجەلەرىنە شىنايى ريزاشىلىعىمىزدى بىلدىرەمىز. بۇل ماسكالار تۇرمىسى تومەن وتباسىلارعا تەگىن تاراتىلاتىن بولادى»، - دەيدى جۇمىسپەن قامتۋ جانە الەۋمەتتىك باعدارلامالار ءبولىمىنىڭ باسشىسى ءادىلحان ءابجانوۆ.
