قازاقپاراتتاعى ونلاين- كونسەرت: حومۋسشى يۋليانا كريۆوشاپكينا ونەرىمەن ءتانتى ەتتى
«الەمدە تارالعان ىندەتكە بايلانىستى بارشامىز ۇيدە وتىرمىز. قازىرگى كەزدە قازاقستاندا بولىپ جاتقان جاعدايدى جاڭالىقتاردان بايقاپ وتىرمىن. قازاقستان پرەزيدەنتى، ۇكىمەتى حالىقتى قولداۋ كورسەتىپ وتىر. ونەر ادامى رەتىندە مەن دە سىزدەردى قولدايتىنىمدى بىلدىرگىم كەلەدى. وسى ورايدا ۇيدەگى ونلاين كونسەرتى تاماشالاۋعا شاقىرامىن. «قازاقپاراتتاعى» تۇركيالىق يرفان گيۋردالدىڭ كونسەرتىن جالعاستىرۋعا نيەتتىمىن. اتاپ ايتقاندا، «قازاقپارات» حالىقارالىق اقپارات اگەنتتىگى جاقسى باستاما ۇيىمداستىرىپ وتىر» ، - دەدى يۋليانا كريۆوشاپكينا.
حومۋسشى ءوزىنىڭ رەپەرتۋارىنداعى ءتۇرلى تۋىندىلاردى ورىندادى. ونلاين كونسەرت بارىسىندا «بابالارعا قۇرمەت» كومپوزياتسياسىن ورىنداپ، وندا تابيعاتتى، حالىق ءداستۇرى مەن ادەپ- عۇرپىن اۋەنمەن سۋرەتتەدى. بۇدان كەيىن ول «مەنىڭ جۇرەگىم» ، «سولتۇستىك تىنىسى» مۋزىكالىق شىعارماسىن كوپشىلىك نازارىنا ۇسىندى. سونىمەن قاتار يۋ. كريۆوشاپكينا قوس ءتىلدى حومۋستا ونەرىن پاش ەتتى. كونتسەرتتى ونلاين رەجيمدە تاماشالاعان ونەرسۇيەر قاۋىم ونەرپازدىڭ شەبەرلىگىن جوعارى باعالادى.
«بارلىقتارىڭىزعا باقىت، توزىمدىلىك تىلەيمىن. تاياۋ ۋاقىتتا وسى ۆيرۋستى جەڭىپ، ءبىر- بىرىمىزگە قوناققا باراتىن بولامىز» ، - دەدى الەمنىڭ ۆيرتۋوز- حومۋسشىسى كونسەرتتى قورىتىندىلاي كەلە.
ايتا كەتەيىك، يۋليانا العاشىندا «ايارحاان» ەتنو توبىندا ونەر كورسەتىپ تانىلعان. ءبىرقاتار حالىقارالىق فەستيۆالدارعا قاتىسىپ، «world music» تىڭدارماندارىن اسەم اۋەزىمەن باۋرادى. يۋليانا توپ قۇرامىندا كوپتەگەن ەلدەردە ءتىرى، ەتنيكالىق مۋزىكا فەستيۆالدارىنىڭ گران- پري، لاۋرەات، حەد- لاينەرلەرى اتانعان. ول انشىلىگىمەن قاتار، حومۋستىڭ سۇيەمەلدەۋىمەن وسۋوحاي، تويۋك، دەگەرەن سەكىلدى فولكلورلىق اۋەندەردى ورىندايدى. ونىڭ داۋىسى مەن حومۋستا ويناۋى كەرەمەت ۇيلەسىپ، ادامنىڭ بويىندا عاجايىپ شاتتىق سەزىمىن وياتادى. ءوزى دە ونەر كورسەتكەندە مۋزىكاسىن «ءتىرىلتۋ» ءۇشىن تۇرلەنە تۇسەدى. يۋليانا ساحا حالقىنىڭ مادەنيەتىمەن تانىستىرىپ قانا قويماي، دەگەرەن ءستيلى مەن حومۋس دىبىسىنىڭ ۇيلەسىمىنەن باسقا حالىقتاردىڭ ۇلتتىق اسپاپتارىن، ءان ستيلدەرىنىڭ دىبىستالۋىن قوسىپ، تاجىريبە جاساپ، جاڭا وبرازداردى ىزدەيدى.
