ديكتور مەن ءانشى داۋىسىنا قالاي كۇتىم جاسايدى؟

ونىڭ ماقساتى - داۋىس كۇتىمىنە نازار اۋدارۋ. سوعان وراي Massaget.kz ءتىلشىسى ديكتور مەن انشىلەردەن داۋىسىنا قانداي كۇتىم جاسايتىنىن سۇرادى.

بۇركىت بەكماعامبەتوۆ، الماتىداعى ورتالىق ستاديون ديكتورى:

داۋىسىم - تابيعي. كوپ كۇتىنبەيمىن، ونى كۇيتتەگەن ەمەسپىن. دەگەنمەن ءوزىمدى شەكتەۋگە تىرىسامىن. بارلىعى اعزانى ادەتتەندىرۋگە بايلانىستى. مىسالى ءدال ۇزاق سويلەردىڭ الدىندا سۋىق، ىستىق ىشپەگەن ءجون. شەكىلدەۋىك، جاڭعاق، ءتاتتى جەمەگەن دۇرىس. اۋىز قۋىسى تىم سۋلانادى. وسىعان دەيىن داۋىسىم سىر بەرىپ كورمەپتى. باپتاپ، جاتتىعۋ جاسايتىن بولسام، تەك جاڭىلتپاشتاردى قايتالايمىن.

ايدوس جاباعين، اباي اتىنداعى وپەرا جانە بالەت تەاترىنىڭ ءسوليسى:

داۋىس بابىندا بولۋى ءۇشىن ادام ەڭ الدىمەن رەجيم ساقتاپ، كەمىندە 7-8 ساعات ۇيىقتاۋى كەرەك. قاتتى ىستىق، سۋىق ىشكەندە اباي بولعان ءجون. ءوزىمدى قىتىرلاق، ءتاتتى، اشتى، قىشقىل تاماقتان تىيىپ وتىرامىن. داۋىسىمدى كۇتۋ ءۇشىن ارنايى جاتتىعۋ جاسايمىن دەي المايمىن، ءبىراق كۇندە تاڭەرتەڭ ەرتە تۇرىپ، دەنەگە قان جۇگىرتەمىن. جاتتىعۋدان كەيىن 15 مينۋت وپەرا ءانشىسى الەكساندرا سترەلنيكوۆانىڭ تىنىس الۋ جاتتىعۋلارىن جاسايمىن. سودان كەيىن فورتەپيانوعا وتىرامىن. ەسكەرەتىن ماڭىزدى قاعيدا - تاماق ىشكەننەن كەيىن 2 ساعات وتكەندە عانا ءان ايتۋ كەرەك.

انشىلەردىڭ دارىگەرى - فونياتور. ونىڭ كەڭەسى بويىنشا مەنىڭ داۋىسىما ەڭ پايدالىسى - دۇرىس تاماقتانۋ، ديەتا ۇستاۋ. سەبەبى تازا دىبىسقا اسقازان، بۇكىل اعزا اسەر ەتەدى. داۋىس - اعزانىڭ ايناسى دەسە بولادى. ەگەر ءانشى كوپ جىل ءان سالام دەسە، رەپەرتۋارىنا عانا ەمەس، ىشكەن اسىنا دا ءمان بەرۋى كەرەك.

شامشاددين وماروۆ، AldaSpan توبىنىڭ ءسوليسى:

اركىمنىڭ داۋىسىنا كۇتىم جاساۋى ءارتۇرلى. مىسالى ءوزىم اسا ءبىر ۋايىمداپ كۇتىم جاسامايمىن. سەبەبى تاماققا شەكتەن تىس نازار اۋدارا بەرسە، ودان سايىن اۋرۋشاڭ بولادى. مۇنىڭ ادام پسيحولوگياسىنا دا اسەرى بار. دەگەنمەن داۋىسقا ارنالعان جاتتىعۋلار كۇندە جاسالۋى كەرەك. دايىندىقتا بىردەن ءان ايتپاۋعا تىرىسامىن. الدىمەن داۋىسقا ارنالعان جاتتىعۋلار جاساپ بارىپ انگە كوشەمىن. كوپ انشىگە ءتان مەنىڭ ماڭىزدى قاعيدام بار - كونسەرتتەن 2-3 ساعات بۇرىن تويىپ تاماق ىشەمىن. سەبەبى 30 مينۋت، 1 ساعات بۇرىن ىشسەڭ، ءان ايتقاندا دۇرىس تىنىس الا المايسىڭ، اۋقىمدى دىبىس شىعارا المايسىڭ. سونىمەن بىرگە جاقسى كوڭىل كۇيدە جۇرگەندى قالايمىن. كوڭىل كۇيىڭ ناشار بولسا، داۋىستىڭ دا بەرەكەسى كەتەدى. كونسەرتتەن كەيىن داۋىس باسىلىپ قالاتىنى بار. مۇندايدا تاماقتى دەمالتىپ، جىلى سۋ ءىشىپ، كوپ سويلەمەۋگە تىرىسامىن. ايتپەسە داۋىستان ايىرىلىپ قالۋ قاۋپى بار.

Massaget.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى