دەپۋتات ونلاين-نەسيەلەر تۋرالى: كوروناۆيرۋستان جىلدام تاراپ جاتىر
«ەلدەگى توتەنشە جاعداي مەن كارانتينگە بايلانىستى كىرىسىنەن ايىرىلعان ازاماتتاردىڭ كوبى ءقازىر نەسيە الۋعا ءماجبۇر بولىپ وتىر. بۇل ءساتتى ۇيدەن شىعارماي-اق، انىقتاماسىز ءارى ينتەرنەت ارقىلى جىلدام نەسيە بەرەتىن ميكروقارجىلىق ۇيىمدار، لومباردتار، قايداعى ءبىر ونلاين- كومپانيالار پايداعا جاراتىپ جاتىر»، - دەگەن دەپۋتات ۇكىمەتپەن بىرگە بۇل ماسەلەگە قارجىلىق نارىقتى دامىتۋ جانە رەتتەۋ اگەنتتىگى دە نازار اۋدارۋى كەرەكتىگىن ايتىپ ءوتتى.
ماجىلىسمەننىڭ ايتۋىنا قاراعاندا، زاڭ بويىنشا جىلدىق ءتيىمدى ستاۆكانىڭ 56 پايىزدىق شەكتى مولشەرى، تولەنبەگەن ءار كۇن ءۇشىن ءوسىمپۇلدىڭ دەڭگەيى 0,5 پايىز تۇرىندە بەلگىلەنگەنىن ەسكە سالدى. زاڭنامالىق شەكتەۋلەرگە قاراماستان، ونلاين- نەسيە بەرۋشى كومپانيالار 100 پايىزدان جوعارى جىلدىق ستاۆكامەن نەسيە بەرۋدە. ودان بولەك گارانتتىق ءۇشىن نەمەسە قارىز بەرگەنى ءۇشىن ونداي ۇيىمدار ءارتۇرلى كوميسسيالاردى دا الا بەرەتىن كورىنەدى.
«اقىرىندا جىلدىق ءتيىمدى ستاۆكا 600 دەن 700 پايىزعا دەيىن كەتىپ جاتىر. ءسوزىم دايەكتى بولۋى ءۇشىن ناقتى مىسالدارمەن كەلتىرەيىن.
«كرەديت 24» كومپانياسى ءوز سوزىمەن كەلتىرگەندە: «قارىز الۋشى تۋرالى مالىمەتتى تەكسەرۋدە ءۇشىنشى تۇلعانىڭ پايداسى ءۇشىن تولەم» ەنگىزىپ، ونىڭ مولشەرىن قارىزدىڭ 56 پايىزىنا تەڭەستىرگەن. بۇل «جىلدام تابىس تابۋ» قىزمەتى 27150 تەڭگەنى قۇرايدى. 100 مىڭ تەڭگە قارىز العان ادامنان «جىلدام تولەم» قوسىمشا قىزمەتى ءۇشىن 27150 تەڭگە الىنعان ناقتى مىسالدارى بار. بۇدان بولەك كەلىسىمدە ءار مەرزىمنىڭ ءوتىپ كەتكەنى ءۇشىن 3 مىڭ تەڭگەلىك ءبىر رەتتىك كوميسسيا، ال مەرزىم شارتىن بۇزعانى ءۇشىن ۋاقتىلى تولەنبەگەن تولەمنىڭ 1 پايىزدىق مولشەرىن تولەۋ شارتى ەنگىزىلگەن»، - دەدى امانجان جامالوۆ.
دەپۋتاتتىڭ ايتۋىنشا، كەلىسىم بويىنشا ەڭ ءبىرىنشى كەزەكتە سىرتقى ۇيىمداردىڭ قىزمەت ءۇشىن تولەمدى، قارىز بەرۋشىنىڭ شىعىندارىن، سىياقىنى، سودان كەيىن بارىپ قانا نەگىزگى قارىزدى تولەۋ كەرەك بولادى. اقىرىندا قارىز العان ادام ەشقاشان بەرەشەكتى وتەي الماي، پايىزداردى وتەپ جۇرە بەرەدى.
«وسىنداي جاعدايدى قارجىلىق نارىقتى دامىتۋ جانە رەتتەۋ اگەنتتىگىنىڭ قايدا قاراپ وتىرعانى تۇسىنىكسىز. ەندى بۇل «ىندەت» كوروناۆيرۋستان جىلدام ءورشىپ بارادى»، - دەدى ماجىلىسمەن. وسىعان بايلانىستى دەپۋتات ۇكىمەتتەن ونلاين-نەسيە بەرەتىن كومپانيالاردىڭ جۇمىسىن تەكسەرۋدى سۇرادى.
