مايرا مۇحامەد قىزى «بۇكىل الەمدىك دۇعانى» ورىنداپ، دارىگەرلەرگە العىس ايتتى
نۇر-سۇلتان. قازاقپارات - قازاقستاندا «بۇكىل الەمدىك دۇعا» اتتى الەمدىك تانىمال تۋىندىعا كليپ ءتۇسىرىلدى.
بۇل تۋرالى قازاقپارات تەاتردىڭ باسپا ءسوز قىزمەتىنە سىلتەمە جاساپ حابارلايدى.
«استانا وپەرا» جەتەكشى سوليسى مايرا مۇحامەد قىزى دۇنيەجۇزى دارىگەرلەرىنە ارناپ «بۇكىل الەمدىك دۇعانى» ورىندادى.
«مەن بارلىعى ءۇشىن ءان سالمايمىن، مەن ءاربىر ادام ءۇشىن ءان سالامىن. بۇگىندە دارىگەرلەر مەن مەديتسينا قىزمەتكەرلەرىنىڭ جانكەشتىلىگى مەن تاباندىلىعىنا تورتكۇل دۇنيە قايران قالۋدا. بۇگىنگى كۇننىڭ باتىرلارى بۇل - باسقانىڭ ءومىرى ءۇشىن شىبىن جانىن شۇبەرەككە ءتۇيىپ، كۇندىز- ءتۇنى قىزمەت ەتىپ جۇرگەن دارىگەرلەر. جەر-جەردە كوروناۆيرۋسقا شالدىققاندار سانى ارتۋدا. دەگەنمەن، جازىلىپ شىققانداردىڭ سانى دا از ەمەس. ارينە بۇعان اق حالاتتى ابزال جانداردىڭ ەرەن ەڭبەگىنىڭ ارقاسىندا قول جەتكىزىپ جاتىرمىز» - دەپ اتاپ ءوتتى اتاقتى ءانشى مايرا مۇحامەد قىزى.
ايتا كەتسەك، «حابار» اگەنتتىگى ق ر مادەنيەت جانە سپورت مينيسترلىگى، «استانا وپەرا» موبت- مەن بىرگە دارىگەرلەرگە ارناپ «بۇكىل الەمدىك دۇعا» اتتى الەمدىك تانىمال تۋىندىعا كليپ ءتۇسىردى. بۇل گرەك كومپوزيتورى ۆانگەليستىڭ كلاسسيكالىق شىعارماسى. بۇعان قوسا كليپتە كوروناۆيرۋسپەن كۇرەسىپ جۇرگەن دۇنيەجۇزى دارىگەرلەرى تۋرالى كادرلار دا قولدانىلدى.
