كارانتين: كوشى-قون قۇجاتتارىن راسىمدەپ ۇلگەرمەگەندەر جاۋاپقا تارتىلا ما
س ق و پوليتسيا دەپارتامەنتى باسپا ءسوز قىزمەتىنىڭ مالىمەتىنشە، توتەنشە جاعدايدىڭ ەنگىزىلۋىنە بايلانىستى حالىققا قىزمەت كورسەتۋ ورتالىقتارى مەن كوشى-قون قىزمەتى ورتالىعى ۋاقىتشا جابىلدى. كوشى-قون جەلىسى بويىنشا مەملەكەتتىك قىزمەتتەر حالىققا تەك «ەلەكتروندىق ۇكىمەت» پورتالى ارقىلى كورسەتىلەدى.
مامانداردىڭ ايتۋىنشا، ازاماتتاردىڭ اراسىندا اسا سۇرانىسقا يە قىزمەتتەردىڭ ءبىرى - ەل تۇرعىندارىن تۇرعىلىقتى جەرى بويىنشا تىركەۋ جانە تىركەۋدەن شىعارۋ. جىل باسىنان وسى قىزمەتتى الۋ ءۇشىن 12 مىڭنان استام سولتۇستىكقازاقستاندىق جۇگىنگەن.
بۇل - كوشى-قون قىزمەتى بولىنىستەرى كورسەتكەن قىزمەت كولەمىنىڭ ۇشتەن ءبىرى. 7,5 مىڭ ادام بۇل قىزمەتتى حالىققا قىزمەت كورسەتۋ ورتالىقتارىنا بارماي-اق ونلاين-رەجيمىندە «ەلەكتروندىق ۇكىمەت» پورتالى ارقىلى العان.
«قازىرگى ۋاقىتتا ءبىرقاتار قىزمەت تۇرلەرىن ونلاين- رەجيمگە كوشىرۋ بويىنشا جۇمىستار اتقارىلۋدا. ازىرگە بۇل پروتسەسس اياقتالعان جوق. بۇدان بولەك، ادامداردى جاۋاپكەرشىلىك تۋرالى ماسەلە الاڭداتادى. كارانتين كەزەڭىندە تەحنيكالىق سەبەپتەرگە بايلانىستى قۇجاتتارىن رەسىمدەپ ۇلگەرمەگەندەر اكىمشىلىك جاۋاپقا تارتىلمايدى»، - دەيدى س ق و پوليتسيا دەپارتامەنتى كوشى- قون قىزمەتى باسقارماسىنىڭ باستىعى تالعات ءابىلوۆ.
جالپى جىل باسىنان وبلىستا ميگراتسيا قىزمەتى حالىققا 36 مىڭنان استام مەملەكەتتىك قىزمەت كورسەتكەن.
اۆتور: اقەركە داۋرەنبەك قىزى
