ەلوردا كاسىپورىندارى كارانتين كەزىندە ءجۇرىپ-تۇرۋعا جالعان انىقتامالار بەرگەن
«ەلوردادا ءبىرقاتار كاسىپورىندار نۇر-سۇلتان قالاسىندا كەدەرگىسىز ءجۇرىپ-تۇرۋ ءۇشىن جالعان انىقتامالار جاساعان. كاسىپورىن باسشىلارى ولاردا جۇمىس ىستەمەيتىن ازاماتتارعا دا انىقتاما بەرگەن. ءتارتىپبۇزۋشىلىق فاكتىلەرىن پوليتسيا قىزمەتكەرلەرى پلانشەتتەگى ەلەكتروندى بازا ارقىلى تەكسەرۋ كەزىندە انىقتادى. بارلىق پاترۋلدىك قىزمەتتەر پلانشەتتەرمەن قامتىلعان. ءتارتىپبۇزۋشىلار ەندى جاۋاپكەرشىلىككە، ءتىپتى قىلمىستىق جاۋاپقا تارتىلۋى مۇمكىن»، - دەلىنگەن قالا اكىمدىگىنىڭ اقپاراتىندا.
ايتا كەتەيىك، وتكەن اپتادا قالادا كارانتين رەجيمىن بۇزعانى ءۇشىن 800 دەن استام ازامات اكىمشىلىك جاۋاپكەرشىلىككە تارتىلدى، ونىڭ 32 ءسى قاماۋعا الىندى، قالعاندارىنا ايىپپۇل سالىندى. نۇر-سۇلتان قالالىق اكىمشىلىك پوليتسيا باستىعى ەلجان شوپەكوۆتىڭ ايتۋىنشا، كارانتين كەزىندە ەلوردادا بەس مىڭعا جۋىق پوليتسەي قوعامدىق ءتارتىپتى قاداعالاۋدا.
«قالا تۇرعىندارىنىڭ كوبى ءتارتىپتى بۇزىپ جاتقان جوق. الايدا، پوليتسيانى الداۋعا تىرىساتىن تۇرعىندارىمىز دا بار. شاعىن كاسىپورىن يەلەرى ازاماتتار قالا ىشىندە كەدەرگىسىز، ەركىن ءجۇرىپ- تۇرۋى ءۇشىن جۇمىس ورنىنان جالعان انىقتامالار بەرگەن. ولار اكىمشىلىك، ءتىپتى قىلمىستىق جاۋاپكەرشىلىككە تارتىلۋى مۇمكىن»، - دەپ اتاپ ءوتتى ە. شوپەكوۆ.
سوڭعى اپتادا ايىپ تۇراعىنا 400 گە جۋىق اۆتوكولىك جەتكىزىلدى، 500 دەن استام مەملەكەتتىك ءنومىر تاركىلەندى.
«كارانتيننىڭ ءبىرىنشى كۇنىنەن باستاپ ءتارتىپ بۇزعانى ءۇشىن اكىمشىلىك جاۋاپكەرشىلىككە شامامەن ءۇش مىڭ ادام تارتىلدى. پوليتسيا تۇرعىنداردى كارانتين رەجيمىن بۇزباۋعا جانە قاۋىپسىزدىك شارالارىن ساقتاۋعا شاقىرادى. ءوزىڭىزدىڭ جانە جاقىندارىڭىزدىڭ دەنساۋلىعىن ويلاڭىز»، - دەدى شوپەكوۆ.
