مەركىدە كوروناۆيرۋس جۇقتىرعان دارىگەردىڭ شاعىمىنان كەيىن اۋدان اكىمى جازالاندى
مەركى اۋداندىق ورتالىق اۋرۋحاناسىنداعى رەزونانستى وقيعا بويىنشا اۋدان اكىمى مەيىرحان ومىربەكوۆكە سوگىس جاريالاندى، ال وبلىستىق دەنساۋلىق ساقتاۋ باسقارماسىنىڭ باسشىسى مارات جۇمانقۇلوۆتىڭ جاۋاپكەرشىلىگى كارانتين رەجيمى اياقتالعاننان كەيىن قارالاتىن بولدى.
بۇل تۋرالى وبلىس اكىمى بەردىبەك ساپاربايەۆتىڭ توراعالىعىمەن وتكەن جيىندا قارالدى.
ايتا كەتەيىك، باس قوسۋ بارىسىندا ءتيىستى تۇلعالار وبلىستا ناۋقاستارمەن جۇمىس ىستەيتىن مەديتسينا قىزمەتكەرلەرىن قورعانىش كوستيۋمدەرىمەن جانە باسقا دا جەكە قورعانۋ قۇرالدارىمەن قامتاماسىز ەتۋ جونىندەگى جۇمىستار جالعاسىن تاباتىندىعىن ايتىپ سەندىردى.
وبلىس اكىمى جيىندا جەرگىلىكتى اتقارۋشى ورگاندار مەن مەديتسينالىق مەكەمەلەردىڭ باسشىلارىن ازاماتتاردىڭ وتىنىشتەرىنە، تىلەكتەرىنە جانە سىني وتىنىشتەرىنە مۇقيات نازار اۋدارۋعا، الەۋمەتتىك جەلىلەردە كوتەرىلگەن ماسەلەرگە جەدەل دەن قويۋعا شاقىردى.
باس قوسۋدا پوليتسەيلەردىڭ ازاماتتاردىڭ كارانتيندىك تالاپتاردى ساقتاۋىن قامتاماسىز ەتۋ جونىندەگى جۇمىسى تۋرالى پوليتسيا دەپارتامەنتىنىڭ باستىعى جانات سۇلەيمەنوۆ باياندادى.
ول وبلىس بويىنشا 214 كارانتيندىك رەجيمدى بۇزۋ فاكتىسى انىقتالعانىن، بلوكپوستتا جۇمىس ىستەيتىن پوليتسيا قىزمەتكەرلەرى اراسىندا ينفەكتسيانىڭ بار-جوعىن انىقتاۋ بويىنشا تەست جۇرگىزۋ قاجەتتىگىن اتاپ ءوتتى.
ەسكە سالا كەتەيىك، بۇعان دەيىن كوروناۆيرۋس ينفەكتسياسىن جۇقتىرىپ العان اتالعان اۋداندىق اۋرۋحانانىڭ ينفەكتسيونيست دارىگەرى تولقىناي وردابايەۆا الەۋمەتتىك جەلىدە ءوزى قىزمەت ەتەتىن اۋرۋحاناعا قاتىستى ماسەلەلەردى جەتكىزگەن بولاتىن.
سودان كەيىن جامبىل وبلىسىنىڭ مەركى اۋدانىندا كوروناۆيرۋس جۇقتىرعان دارىگەردىڭ شاعىمى بويىنشا تەكسەرۋ باستالدى.
سونىمەن قاتار، Nur Otan پارتياسىنىڭ تەكسەرۋىنەن سوڭ جامبىل وبلىسىندا اكىمنىڭ ورىنباسارى مەن باس دارىگەر جازالانعان ەدى. وبلىس اكىمىنىڭ تاپسىرماسىمەن قۇرىلعان ارنايى كوميسسيانىڭ تەكسەرىسىنەن سوڭ مەركى اۋداندىق اۋرۋحاناسىنىڭ باس دارىگەرى مەن ونىڭ ورىنباسارى جۇمىستان بوساتىلعان.
