تۇركىستان وبلىسىندا توتەنشە جاعداي كەزىندە توي جاساۋشىلار ازايماي تۇر

وبلىس بويىنشا توتەنشە جاعداي رەجيمىن بۇزۋ بويىنشا 123 جايت انىقتالىپ، 43 تۇرعىن قاماۋعا الىندى، دەپ حابارلايدى قازاقپارات ءتىلشىسى.

وبلىستىق پ د باسپا ءسوز قىزمەتىنىڭ مالىمەتىنشە، سوتتىڭ شەشىمىمەن 63 تۇرعىنعا اكىمشىلىك ايىپپۇل سالىنعان. تاعى ءبىر ازاماتقا ەسكەرتۋ بەرىلىپ، 16 تۇرعىننىڭ ءىسى سوتتا قارالۋدا.

«بۇل قۇقىقبۇزۋشىلىق جاساعان ازاماتتاردىڭ ءبىرى توتەنشە جاعدايعا قاراماستان توي، تۋعان كۇن، بەتاشار، تۇساۋكەسەر جاساعان. وزگەلەرى ويىن- ساۋىق ورىندارىن اشىپ، ادامداردى قابىلداعانى ءۇشىن جاۋاپقا تارتىلدى. ال، تاعى بىرەۋلەرى شەكتەلگەن ۋاقىتتا ادامدار توبى بولىپ شوعىرلانعانى ءۇشىن ەسكەرتۋ الىپ جاتىر. سونداي- اق، بلوكپوستتاردا قىزمەتتە تۇرعان پوليتسەيگە قارسىلىق ءبىلدىرىپ، قاماۋعا تۇسكەن تۇرعىن دا بار» دەلىنگەن حابارلامادا. وڭىردەگى ءتارتىپ ساقشىلارىنىڭ قارقىندى جۇمىس اتقارۋى ناتيجەسىندە قىلمىستار سانى % 18,2 - عا ازايعان. قوعامدىق ورىندا جاسالعان قۇقىقبۇزۋشىلىقتار 25,7 پايىزعا، كوشەلەردە جاسالاتىن قىلمىستار 26,2 پايىزعا تومەندەگەن.

اۆتور: اينۇر اقبايەۆا

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى