ق ر ۇلتتىق بانك ءتوراعاسى داعدارىسقا قارسى شارالار قالاي ورىندالىپ جاتقانىن باياندادى

بۇل تۋرالى بۇگىن ۇكىمەت وتىرىسىندا ق ر ۇلتتىق بانك ءتوراعاسى ەربولات دوسايەۆ ايتتى، دەپ حابارلايدى قازاقپارات ءتىلشىسى.

«مەملەكەت باسشىسى باستاما جاساعان داعدارىسقا قارسى شارالاردىڭ ءبىرىنشى توپتاماسى اياسىندا مىناداي جۇمىس جۇرگىزىلدى. بىرىنشىدەن، ەكونوميكانىڭ باسىم سالالارىن جەڭىلدىكپەن كرەديتتەۋ باعدارلامالارى ارقىلى وسى جىلعى 10-ساۋىردەگى جاعداي بويىنشا، بانكتەر جالپى سوماسى 422,2 ميلليارد تەڭگەگە 619 ءوتىنىم قابىلدادى. 292,2 ميلليارد تەڭگە سوماعا 470 جوبا ماقۇلداندى. 153 ميلليارد تەڭگە سوماعا 352 قارىز بەرىلدى»، - دەدى ۇلتتىق بانك باسشىسى.

ونىڭ اتاپ وتۋىنشە، ۇلتتىق بانك وسى باعدارلامانى قارجىلاندىرۋدى 1 تريلليون تەڭگەگە دەيىن 400 ميلليارد تەڭگەگە ۇلعايتۋ تۋرالى شەشىم قابىلدادى. ول ازىق-تۇلىك قاۋىپسىزدىگىن قامتاماسىز ەتۋگە جانە يمپورتقا تاۋەلدىلىكتى تومەندەتۋگە باعىتتالاتىن بولادى.

«قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ تاپسىرماسى بويىنشا توتەنشە جاعدايدىڭ ەنگىزىلۋىنەن زارداپ شەككەن شوب سۋبەكتىلەرىن جانە جەكە كاسىپكەرلەردى قولداۋعا ارنالعان جەڭىلدىكپەن كرەديتتەۋ باعدارلاماسى ازىرلەنىپ، ىسكە اسىرىلا باستادى. باعدارلاما اياسىندا بانكتەرگە 12-ايعا دەيىنگى مەرزىممەن جالپى سوماسى 600 ميلليارد تەڭگەگە نەگىزدەلگەن سالىمدار ءبولىندى. ءۇش ايدا جۇزەگە اسىرىلاتىن قاراجاتتى يگەرۋ باستالىپ كەتتى. كاسىپكەرلەر 647 ءوتىنىم بەردى، 17,3 ميلليارد تەڭگە سوماسىنا 45 قارىز بەرىلدى»، - دەدى ەربولات دوسايەۆ.

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى