قازاقستاندا العاش رەت موبيلدى كينو فەستيۆالى ءوتىپ جاتىر
جوبا ارقىلى فەستيۆال ۇيىمداستىرۋشىلارى - سەناريست جانە رەجيسسەر دميتري باينازاروۆ باستاعان MBff Production توبى كارانتين كەزەڭىندە شىعارماشىلىق قايراتكەرلەرگە قولداۋ كورسەتىپ، ولاردىڭ شىعارماشىلىق ەنەرگياسى مەن دارىنىن جاڭا باعىتقا بۇرۋعا شەشىم قابىلدادى. «موبيلدى كينونىڭ كينو يندۋسترياعا جاڭا فورمات رەتىندە ەنگەنىنە 10 جىلدان استام ۋاقىت بولدى. الايدا، ءبىزدىڭ ەلدە جانە بۇكىل ت م د ەلدەرىندە ونەردىڭ بۇل تۇرىنە قىزىعۋشىلىق ەندى عانا ارتىپ كەلە جاتىر. زاماناۋي گادجەتتەردىڭ قوسىمشا جابدىقتارسىز جانە شىعىنسىز جوعارى ساپالى فوتو نەمەسە ۆيدەو جاسايتىن مۇمكىندىگى بار. مۇنداي تەحنولوگيالار تالانتتى رەجيسسەرلەر مەن وپەراتورلارعا ءوز يدەيالارىن جۇزەگە اسىرۋعا، ەكسپەريمەنت جۇرگىزۋگە، جاڭا ۆيزۋالدى شەشىمدەردى ىزدەۋگە، سول ارقىلى ساندىق تەحنولوگيالارمەن ءبىر باعىتتا قوزعالۋعا مۇمكىندىك بەرەدى. وسى ورايدا، ادام پوتەنتسيالىن دامىتۋدى ماقسات تۇتاتىن تۇڭعىش پرەزيدەنت قورى ءموبيلدى كينو فورماتىنداعى وتاندىق كينو وندىرىسىندەگى جاڭا ەسىمدەردى قولداۋعا دايىن» ، - دەيدى قوردىڭ الماتىداعى وكىلدىگىنىڭ ديرەكتورى سەرگەي توحتاروۆ.
Mobile Blockbuster film festival بايقاۋىنىڭ تاقىرىبى - «ماسكالار» . ماسكالار ءسوزىنىڭ ماعىناسى كەڭ. ول مەديتسينالىق، تەاترلىق، الەۋمەتتىك جانە ادامنىڭ كۇندەلىكتى ومىردە كيەتىن ماسكاسى بولۋى مۇمكىن. بايقاۋعا قاتىسۋ ءۇشىن فيلمدى تەك سمارتفونعا نەمەسە پلانشەتكە ءتۇسىرۋ كەرەك. فيلمدەردىڭ جالپى ۇزاقتىعىنىڭ %10 ىن درونمەن نەمەسە ەكشن- كامەرالارمەن تۇسىرۋگە بولادى. شامدار، كراندار، اربالار، «پەتليچكالار» جانە ت. ب. وسىنداي كەز- كەلگەن وندىرىستىك جابدىقتارعا رۇقسات ەتىلەدى. بەينە فايلداردىڭ جۇكتەۋ جۇيەسىنە جۇكتەلگەن سىلتەمەسىن جانە ارنايى فورمادا تولتىرىلعان ءوتىنىمدى فەستيۆالدىڭ MBfilmfest.kz@gmail.com ەلەكتروندىق پوشتاسىنا جىبەرۋ كەرەك. قاتىسۋشىلاردى تىركەۋ جانە جۇمىستاردى قابىلداۋ 2020 -جىلدىڭ 12 - ساۋىرىنەن 15 - مامىرىنا دەيىن جۇرگىزىلەدى. MBff جەڭىمپازدارى 2020 -جىلدىڭ 17 - مامىرىندا ونلاين فورماتتا انىقتالادى. بايقاۋدىڭ تولىق شارتتارى fpp.kz سايتىندا «بايقاۋلار» بولىمىندە جانە mbfilmfest.com سايتىندا جاريالانعان.
