الكوگول ءىشۋ كوروناۆيرۋستى جۇقتىرۋدان قورعاي الا ما
بۇل سۇراققا كارديولوگيا جانە ىشكى اۋرۋلار عىلىمي-زەرتتەۋ ينستيتۋتى كۇندىزگى ستاتسيونار مەڭگەرۋشىسىنىڭ مىندەتىن اتقارۋشى، تەراپيەۆت دارىگەر گاۋحار قوجاكەيەۆا جاۋاپ بەردى، دەپ حابارلايدى قازاقپارات.
ادام اعزاسىنا الكوگولدىڭ كەلتىرەتىن زيانى تۋرالى تاقىرىپ ءار كەزدە وزەكتى. بۇكىل الەم COVID-19 پاندەمياسىنان زارداپ شەگىپ وتىرعان قازىرگى ۋاقىتتا بۇل تاقىرىپ ماڭىزدىلىعىن جوعالتپادى. ادامداردىڭ جەكەلەگەن توپتارى اراسىندا سپيرت پەن الكوگول كوروناۆيرۋس ينفەكسياسىنان ساقتاي الادى دەگەن پىكىر قالىپتاسۋدا.
بۇل پىكىرلەر ينفەكسيا كەزىندە قولدى، قولمەن ۇستالاتىن زاتتاردى سپيرت ەرىتىندىسىمەن نەمەسە قۇرامىندا ءسپيرتى بار مايلىقتارمەن تازالاۋ قاجەتتىگى تۋرالى نۇسقاۋلارعا سۇيەنە وتىرىپ، الكوگول ىشىمدىكتەرىن قابىلداعان دا دۇرىس دەگەن ويعا نەگىزدەلىپ وتىر. ءبىراق گاۋحار قوجاكەيەۆانىڭ ايتۋىنشا، اتالمىش ىندەتتى ەمدەۋدە الكوگول ءتيىمدى دەگەن پىكىرلەر قاتە.
«سپيرتتى ەرىتىندىلەر جانە قۇرامىندا سپيرتى بار مايلىقتار سپيرتتىڭ ءارتۇرلى سۇيىقتىقتار مەن مايلاردا جاقسى ەرىپ كەتۋ قاسيەتىنىڭ بولۋىنان زاتتاردى تازالاۋ ءۇشىن پايدالانىلادى. سوندىقتان، ونى پايدالانۋ قورعانۋدىڭ باسقا شارالارىنا قاراعاندا تيىمدىرەك. سپيرتتىڭ كومەگىمەن قولمەن لاستانعان، ياعني تەرىدەن بولىنەتىن، قۇرامىندا مايى بار زاتتار جاقسى تازالانادى. مايلار ميكروورگانيزمدەردىڭ تارالۋىنا قولايلى ورتا بولىپ تابىلادى. سوندىقتان دا تەرىدەن بولىنەتىن مايلار سپيرتتە تيىمدىرەك ەرىتىلەتىن بولعاندىقتان، ءتۇرلى مەديتسينالىق مانيپۋلياتسيالار جۇرگىزۋ كەزىندە سپيرت تەرىنى مايلىقتارمەن زالالسىزداندىرىلادى.
بۇگىندە قاۋىپتى ينفەكسيانى جۇقتىرۋدان قورقۋ جاعدايىندا كەيبىر ادامدار الكوگول ونىمدەرىن ساتىپ الا باستادى.
«حالىق ەمى» دەپ اتالاتىن ادىستەردە كوبىنە ازداعان سپيرت قولدانىلادى. الايدا ولاردىڭ قۇرامى بىرنەشە كومپونەنتتەن تۇرادى. ءبىراق تازا كۇيىندەگى الكوگول ادامدى كوروناروۆيرۋس ينفەكسياسىنىڭ تارالۋى مەن جۇقتىرۋىنان ساقتاي المايدى»، - دەيدى دارىگەر.
گ. قوجاكەيەۆا سپيرتتىڭ جوعارى كونسەنتراتسياسى جانە جوعارى دوزاسى ۆيرۋستاردى جويا الاتىندىعىن جوققا شىعارمايدى. الايدا بۇل ىشىمدىككە قۇمارلىقتى تۋدىرا وتىرىپ، ادام ءۇشىن قاۋىپتى بولاتىندىعىن ەستەن شىعارماعان ءجون.
«وسىنىڭ سالدارىنان، ءتىپتى ادام ءولىمى بولۋى ىقتيمال. كوروناۆيرۋس سيمپتومدارى اعزانىڭ قاتتى ۋلانۋىنا اكەلەدى. ال ىشىمدىكتى پايدالانۋ وسى پروتسەستى ۋشىقتىرۋعا جانە اعزانىڭ ساۋىعىپ كەتۋىنە كەرى اسەرىن بەرۋى مۇمكىن. الكوگولدىڭ جارتىسى وكپە ارقىلى شىعارىلادى جانە كەز كەلگەن ينفەكسيادا، ونىڭ ىشىندە كوروناۆيرۋس ينفەكسياسىندا، اسىرەسە ونىمەن قوسا شىلىم شەگىلەتىن بولسا، كەرىسىنشە - اسا قاۋىپتى . وسى كەڭەس ءۇي كارانتينىندە جاتقان ادامدارعا ارنالعان، سەبەبى حالىقتىڭ بۇل بولىگى دە قازىرگى كەزدە اسا وسال بولىپ وتىر. الكوگولدى پايدالانۋ جۇرەككە قوسىمشا اۋىرلىق تۇسىرەدى. بۇل، ادام دەنساۋلىعى ءۇشىن، ونىڭ ىشىندە جۇرەكتىڭ توقتاپ قالۋىنا اكەلىپ سوقتىراتىن قاۋىپتى فاكتور. سونىمەن قاتار الكوگول باكتەريالار مەن ۆيرۋستاردىڭ تارالۋىنا قولايلى ورتانى قالىپتاستىرادى، اعزانىڭ ءتۇرلى اۋرۋلارعا قارسى تۇرۋىن ازايتا وتىرىپ، يممۋنيتەتتى السىرەتەدى. جوعارىدا ايتىلعانداردى قورىتىندىلاي وتىرىپ، الكوگول كوروناۆيرۋس ينفەكسياسىنان قورعاي المايتىندىعىن جانە ولاردىڭ ادامنىڭ ساۋىعۋىنا اسەر ەتپەيتىندىگىن ايتقىمىز كەلەدى»، - دەيدى مەديتسينا مامانى.
سونداي-اق دارىگەر تۇشكىرۋ، تاماقتىڭ اۋرۋى جانە جىبىرلاۋى، قۇرعاق جوتەل، مۇرىننىڭ ءبىتۋى، دەنەنىڭ اۋىرۋى، دەنە قىزۋىنىڭ جوعارىلاۋى، تىنىس الۋدىڭ قيىنداۋ بەلگىلەرى پايدا بولعان جاعدايدا شۇعىل تۇردە دارىگەر شاقىرۋعا كەڭەس بەردى.
