تۇڭعىش عارىشكەردىڭ ماحاببات حيكاياسى

ول پولكوۆنيك، كەڭەس وداعىنىڭ باتىرى بولدى. 1961-جىلى 12- ساۋىردە بايقوڭىر الاڭىنان تۇڭعىش رەت عارىشقا ۇشىپ، جەردى اينالىپ، 1 ساعات 48 مينۋتتان كەيىن جەرگە قايتا قونعان.

قاراپايىم جىگىت ءبىر كۇندە ەسىمى كۇللى الەمگە تانىمال بولىپ شىعا كەلدى.

ءبىز بۇگىن تۇڭعىش عارىشكەردىڭ العاشقى جانە سوڭعى ماحابباتى جايلى اڭگىمەلەيتىن بولامىز.

ۆالەنتينا گورياچيەۆا مەن يۋري گاگارين ءبي الاڭىندا تانىسقان. ول كەزدە قارا تورى ۆاليا ورىنبور قالاسىندا تەلەگرافيست بولىپ قىزمەت اتقاراتىن.

ال ەشكىمگە تانىس ەمەس ۋچيليشە كۋرسانتى يۋرا بولسا قاراپايىم قىزدى ءبىر كورگەننەن ۇناتىپ قالادى. ەكى جىل بويى دوس بولىپ ارالاسقاننان كەيىن يۋري ءوزىنىڭ سەزىمىن ءبىلدىرىپ، شاڭىراق كوتەرەدى.

وسىلايشا جاي تانىستىقتان باستالعان سەزىم ۇشقىنى، ۇلكەن ماحابباتقا ۇلاسادى. وزگە جەردە جۇرگەن جىگىتتىڭ اتا-اناسى كەلە الماعاندىقتان تويدى ەكى مارتە تويلاۋعا تۋرا كەلەدى.

العاشقى تويلارىن ورىنبوردا اتاپ وتسە، ەكىنشى رەت يۋريدىڭ تۋعان جەرىندە تويلايدى.

1959-جىلى گاگاريندەر وتباسىندا تۇڭعىش ءسابي دۇنيە ەسىگىن اشادى. قىزى ەلەنا تۋىلعان سوڭ، يۋري 3 مىڭ ادامعا جۋىق ۇمىتكەرلەردەن قۇرالعان عارىشكەرلەردىڭ وتريادىنا ءوزىن ۇسىنادى.

وسىلايشا ول تانىس ەمەس ىستە باعىن سىناماق بولادى.

1960-جىلى ك س ر و عارىشكەرلەر وتريادىنا الىنادى. ماسكەۋ قالاسىنىڭ ماڭىنداعى جۇلدىزدار قالاشىعىنا كەلىپ ورنالاسادى. عارىشقا اتتاناردان ءبىر اي بۇرىن ەكىنشى قىزى گالينا ومىرگە كەلەدى.

كەڭەستىك داۋىردەگى قاراپايىم وتباسى 12- ساۋىردەن باستاپ، دۇنيەجۇزىنە تانىمال بولىپ شىعا كەلەدى.

جۋرناليستتەر يۋري گاگارين ەسىمىن جارياعا جار سالىپ جازا باستايدى. ونىڭ وتباسىن، قوس قىزدارىن سۋرەتكە تۇسىرۋگە تالپىنادى. عارىشكەردىڭ كۇندەلىكتى ومىرىنە ادامدار قىزىعۋشىلىق تانىتا باستادى.

ال يۋري بولسا، جۇمىستان بوساي سالىسىمەن وتباسىمەن قاۋىشۋعا اسىعاتىن. سەبەبى ۇيىندە اسىل جارى، قوس قارلىعاشى كۇتىپ وتىردى. اتاعى جەر جارعان وتاعاسىنا ۆالەنتينا بارىنشا جاعداي جاسادى.

ول بالا تاربيەسىمەن اينالىسىپ، ۇيبيكەسى بولىپ، كەلگەن قوناقتاردى ىلتيپاتپەن كۇتىپ الاتىن.

تۇڭعىش عارىشكەردىڭ جارى كۇيەۋىنىڭ اتاعىنا قاراماي، قاراپايىم قالپىن ساقتاپ قالدى. ونى اتاق پەن بايلىق وزگەرتپەدى.

الايدا باقىتتى وتباسى، قۋانىشتى بالالار ءبىر كۇندە بار باقىتىنان ايىرىلدى.

1968-جىلى 27- ناۋرىزدا يۋري گاگارين مەن ۆلاديمير سەرەگين ۇشاقپەن جاتتىعۋ كەزىندە قازا تاپتى. قازا بولارىن سەزگەندەي يۋري جارىنا قوشتاسۋ حاتىن قالدىرىپتى.

«ەگەر ءبىر جاعداي بولسا، ەڭ الدىمەن قايعىدان قۇسا بولما ۆاليۋشا. ءومىردىڭ اتى ءومىر، ەرتەڭ كولىك باسىپ كەتپەيتىنىنە ەشقانداي كەپىلدىك جوق. ءوتىنىش، قىزداردى مەن جاقسى كورگەندەي جاقسى كور، ولاردى قورعا. ولاردى اقساۋساق ەتىپ ەمەس، ومىرگە قاسقايا قارسى تۇراتىنداي ەتىپ تاربيەلە. ال جەكە ءومىرىڭدى قالاي دۇرىس دەپ شەشسەڭ، سولاي ءومىر ءسۇر. ەشقانداي مىندەتتەمە قويمايمىن جانە ولاي ىستەۋگە قۇقىم جوق» دەپ جازىپ قالدىرعان ەكەن.

وسىلايشا تۇڭعىش عارىشكەردىڭ ماحاببات حيكاياسى مۇڭدى اياقتالادى.

ۆالەنتينا گاگارينا جۋرناليستتەرگە سۇحبات بەرۋدەن ءۇزىلدى-كەسىلدى باس تارتتى. كوزى تىرىسىندە جەر كوككە سىيدىرماي ماقتاعان باسىلىمداردىڭ كەيبىرى، اششى سۋعا سىلقيا تويىپ، قازاعا ۇشىرادى دەپ قارا كۇيە جاققانىنا توزە المادى. كۇيەۋىنىڭ قازاسىنا قابىرعاسى قاتتى قايىسقان ول باسقا كۇيەۋگە شىقپادى.

قىزداردى ءوسىرىپ، اياققا تۇرعىزدى. اكەلەرى قالاعانداي، انالارى تاربيە بەردى. ال عارىشكەردىڭ جارى كۇيەۋىمەن كەلىپ قونىستانعان ۇيىندە اقتىق دەمى تاۋسىلعانشا تۇردى. بيىل ول 85 جاسىندا ومىردەن ءوتتى.

newsroom.kz

ۇقساس

ەلىمىزدە وقۋلىقتاردى دايىنداۋ جانە باقىلاۋ ءتارتىبى جاڭارتىلدى