كارانتين كەزىندە وتباسىلىق جانجالعا جول بەرمەس ءۇشىن نە ىستەۋ كەرەك - پسيحواناليتيك كەڭەسى
Kazinform Instagram پاراقشاسىندا تىكەلەي ەفيرگە شىققان قازاقستانداعى تانىمال پسيحولوگ، پسيحواناليز ينستيتۋتىنىڭ ديرەكتورى اننا قۇدياروۆا وسىنداي قاۋىپتىڭ بارىن ايتىپ ءوتتى، دەپ حابارلايدى قازاقپارات ءتىلشىسى.
«قازىر ادامداردى اشۋ-ىزا بۋىپ تۇر. بۇل جاعداي وتباسىنداعى جانجالدى، ۇرىس-كەرىستى تۋىنداتادى. اقىرى ۇيدەگىلەردىڭ ءبىرىنىڭ (كوبىنە ەر ادامدار) ىشكىلىككە بەرىلۋى دە كوبەيۋدە. مۇنىڭ سوڭى وتباسىلىق زورلىق-زومبىلىققا اپارادى»، - دەيدى اننا قۇدياروۆا.
پسيحواناليتيك ەلدەگى ءارتۇرلى جاعداي، ونىڭ ىشىندە ەكونوميكالىق سيپاتتاعى احۋال دا وسىنداي ۇرىس-كەرىستى تۋىنداتاتىنىن ايتادى.
«ەموتسيالىق نەمەسە ەكونوميكالىق تۇرعىدا قازىر جاعداي ءماز ەمەس. ايتسە دە، ءدال وسى كەزەڭدە ادامدار ءبىر-بىرىنە تۇسىنىستىكپەن قاراپ، سابىرلى بولۋى كەرەك. البەتتە، شەكتەۋلى كەڭىستىكتە قامالىپ قالۋ وڭاي ەمەس. مۇنداي كۇردەلى كەزەڭدە ەرلى-زايىپتىلاردىڭ اجىراسۋ فاكتىلەرى ارتىپ كەتە مە دەپ قورقامىز. اينالىپ كەلگەندە جاۋاپكەرشىلىك ءوز موينىمىزدا ەكەنىن ۇعىنۋىمىز كەرەك. كەز كەلگەن قادامعا بارماس بۇرىن بالالارىڭىز بەن وتباسىڭىزدىڭ جايىن ويلاعانىڭىز ءجون»، - دەدى ول.
پسيحولوگ مۇنداي جاعدايدا ۇرىس-كەرىستى اينالىپ ءوتۋ وڭاي بولماسا دا، شەكارادان شىعىپ كەتپەۋ كەرەكتىگىن ەسكەرتەدى.
اۆتور: ايان بەكەن ۇلى
