ىندەتتىڭ تارالۋىن توقتاتپاساق، جاعدايدى ۋشىقتىرىپ الامىز – ق ر پرەزيدەنتى
«كوروناۆيرۋس پاندەمياسىنىڭ زاردابىن بۇكىل دۇنيە ءجۇزى تارتىپ وتىر. بۇل ىندەت ءبىزدىڭ ەلىمىزدىڭ ەكونوميكاسىنا دا تەرىس ىقپالىن تيگىزۋدە. سوندىقتان، قازىرگى تاڭدا وسى داعدارىسقا قارسى ناقتى شارالار قابىلداپ وتىرمىز. جالپى، بۇكىل الەم كوروناۆيرۋسقا قارسى كۇن سايىن ەمەس، ساعات سايىن كۇرەس جۇرگىزىپ جاتىر. الەم جۇرتشىلىعى ايتىپ وتىرعانداي، بۇل داعدارىس - ەكىنشى دۇنيەجۇزىلىك سوعىستان كەيىن بولىپ تۇرعان ەڭ اۋقىمدى جانە اسا قاۋىپتى الاپات. مەن ءوز سوزىمدە ايتىپ ءوتتىم. ءبىز كارانتين شارالارىنىڭ ارقاسىندا ۆيرۋستىڭ جاپپاي تارالۋىن باسەڭدەتتىك. تۇتاستاي العاندا، جاعداي باقىلاۋدا»، - دەدى ق. توقايەۆ.
مەملەكەت باسشىسى اتاپ وتكەندەي، ەلوردا مەن الماتىداعى قازىرگى جاعداي تۇراقتى. «ءبىراق، قاراعاندى، اقمولا، قىزىلوردا، تۇركىستان، جامبىل وبلىستارىندا اۋرۋعا شالدىققانداردىڭ سانى كۇرت ءوسىپ كەتتى. بۇل اتقارىلعان جۇمىستاردىڭ جەتكىلىكسىزدىگىن جانە قوسىمشا شارالار قابىلداۋ قاجەت ەكەنىن كورسەتەدى. وڭتۇستىك - حالىق تىعىز ورنالاسقان ءوڭىر. سوندىقتان، ىندەتتىڭ تارالۋىن توقتاتپاساق، جاعدايدى ۋشىقتىرىپ الامىز. وعان قوسا، كوكتەمگى ەگىس ناۋقانى باستالدى. «جۇمىسپەن قامتۋ جول كارتاسى» بويىنشا ءبىرقاتار جوبالار قولعا الىنادى. وسىنداي ۋاقىتتا ەلدەگى ەپيدەميولوگيالىق احۋالعا ايرىقشا نازار اۋدارۋىمىز كەرەك. بۇل - اسا ماڭىزدى مىندەت»، - دەدى پرەزيدەنت.
ايتا كەتەيىك، مەملەكەت باسشىسى ەلدەگى توتەنشە جاعداي رەجيمىن ءساۋىر ايىنىڭ سوڭىنا دەيىن سوزۋ قاجەت ەكەندىگىن جانە ءۇش مەگاپوليس پەن وڭىرلەردەگى كارانتيندى جالعاستىرۋدى تاپسىردى.
